ދިވެހި ރާއްޖޭގެ މަޝްހޫރު ލަވަކިއުންތެރިޔާ އަބްދުﷲ ހަސަން (ހޮޅުދޫ އަބްދުﷲ) އަވަހާރަވެއްޖެ އެވެ.

"ގައުމީ ގުރާ" ގެ ނަމުން ރާއްޖެއަށް މަޝްހޫރުވެފައިވާ ހޮޅުދޫ އަބްދުﷲ އަކީ ގައުމަށް ގިނަ ހިދުމަތްތަކެއް ކޮށްދެއްވާފައިވާ ބޭފުޅުކެވެ. އަދި އެބޭފުޅެއްގެ މަދަހައިން ގިނަ ބަޔަކު ދަންނަ ހޮޅުދޫ އަބްދުﷲ މީހުން ސިފަކުރައްވަނީ އާންމުންގެ ލޯބި ލިބިގެންވާ އިލްމީ އަދި ހިތްހެޔޮ މިޒާޖެއްގެ ވެރި ހުނަރުވެރި ބޭފުޅެއްގެ ގޮތުގަ އެވެ.

މިއަދުގެ ވަގުތެއްގައި އަބްދުﷲ ހަސަން އަަވަހާރަވެފައިވާއިރު، އޭނާ އަވަހާރަވީ ވަރަށް ގިނަ ދުވަހު ބަލި އެނދުގައި އޮންނެވުމަށްފަހުގައި ކަމަށް މައުލޫމާތުލިބެ އެވެ. އަދި އަވަހާރަވީ އައިޖީއެމްއެޗް ހޮސްޕިޓަލުން ފަރުވާ ހޯއްދަވަމުން ގެންދަވަނިކޮށް ކަމަށް އާއިލާއިން ވަނީ މީޑިޔާތަކަށް މައުލޫމާތުދީފަ އެވެ.

އަބްދުﷲ ހަސަންގެ ޖަނާޒާ ބޭއްވުމަށް ހަމަޖެހިފައިވަނީ މިއަދުގެ މަޣްރިބް ނަމާދަށް ފަހު އެވެ.

އަބްދުﷲ ހަސަން ވަނީ 1981 ވަނަ އަހަރު ލަވަކިޔުމުގެ ރޮނގުން ހިތްވަރު ދިނުމުގެ އިނާމްވެސް ހާސިލް ކުރައްވާފަ އެވެ.