މާލޭގައި ހުންނަ ހުންނަ އިންޑިއާ ހައިކޮމިޝަން ކުރިމަތީގައި ޕާކްކުރުން މަނާކުރުމަށް ސަރުކާރުން މާލޭ ސިޓީ ކައުންސިލްގައި އެދިއްޖެ އެވެ.

"ހުރިހާ"އަށް އެނގިފައިވާ ގޮތުގައި ޕްލޭނިން މިނިސްޓްރީގެ ފަރާތުން އެގޮތަށް ސިޓީ ކައުންސިލްގައި އެދިފައި ވަނީ ލިޔުމުންނެވެ. މިކަމާ ގުޅޭގޮތުން ސިޓީ ކައުންސިލުން އަދި ވަކިގޮތެއް ނުނިންމަ އެވެ.

އިންޑިއަން ހައިކޮމިޝަން ހުންނަނީ މާލޭގެ ގްރީން ޒޯން އޭރިއާ ކަމަށްވާ އަމީރު އަހުމަދު މަގު ހޮޓެލް ޖެން ކުރިމަތީގަ އެވެ.

އިންޑިއާ ހައިކޮމިޝަން ކުރިމަތީ ޕާކްކުރުން މަނާކުރަން ނިންމާފައިވާއިރު، ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ގެކޮޅު ކައިރީ ޕާކްކުރުން ވެސް ވަނީ މަނާކޮށްފަ އެވެ.

އެފަދަ ތަންތަނުގައި ޕާކްކުރުން މަނާކުރަނީ މަޖިލީހުގެ ރައީސް ނަޝީދަށް ދިން ބޮމުގެ ހަމަލާގައި ކަން ހިނގިގޮތުގެ މައްޗަށް ބެލުމަށްފަހު އެވެ. ރައީސް ނަޝީދަށް ހަމަލާދިނުމަށް ބޭނުންކުރި އައިއީޑީ ހަރުކޮށްފައި ވަނީ އެމަނިކުފާނުގެ ގެކޮޅު ކައިރީ ޕާކްކޮށްފައި ހުރި ސައިކަލެއްގަ އެވެ.

އެހެންކަމުން މިފަދަ ފިޔަވަޅުތައް އަޅަން ނިންމީ އެފަދަ ތަންތަނުގައި މިފަދަ ނުރައްކާތެރި ހަމަލާތައް ދިނުމުގެ ފުރުސަތު ބަންދު ކުރުމުގެ ގޮތުންނެވެ.