ސްޓެލްކޯ އަށް 2023 ވަނަ އަހަރު 175 މިލިއަން ގެއްލުންވިއިރު، 2024 ވަނަ އަހަރު 300 މިލިއަން ރުފިޔާގެ ފައިދާ ނެގީ ރައްޔިތުންގެ ކަރަންޓު ބިލުން ކުރި ބޮޑު ވައްކަމުން ކަމުގައި ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެ އެވެ.

އިދިކޮޅު ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ރޭ ބޭއްވި ކައްމަތީ ޖަލްސާގައި ވާހަކަދައްކަވަމުން ޣަފޫރު ވިދާޅުވީ ސްޓެލްކޯ އަށް އެހާ ބޮޑު ގެއްލުމެއް ލިބިފައި އޮވެ ކުއްލިއަކަށް އެ ހާބޮޑު ފައިދާއެއް ލިބޭނެ އިތުރު ވަސީލަތެއް މި ސަރުކާރަށް ނެތް ކަމަށާއި އެއީ ސީދާ ކަރަންޓު ބިލުން ކުރި ބޮޑު ވައްކަމުން ލިބުނު ފައިދާއެއް ކަމަށެވެ.

މި ވައްކަން މި ސަރުކާރުން ކުރަނީ ކަރަންޓު ބިލްތައް އޮޅުވާލައިގެން ކަމަށާއި މިހާރު އެ ވައްކަން ރަށްރަށުގައި ވެސް ކުރަމުން ގެންދާ ކަމަށް ޣަފޫރު ވިދާޅުވި އެވެ.

އޭނާ ވިދާޅުވީ ރައީސް މުހައްމަދު މުއިއްޒުގެ މި ސަރުކާރު އައިފަހުން މިހާރު ދެއަހަރު ވެގެން ދިޔަ އިރުގައި ވެސް ގާބުރިއެއްގެ މިންވަރު ވެސް ބާއްވާފައި ނުވާކަމަށެވެ.

އެގޮތުން ޣަފޫރު ވިދާޅުވީ ދައުލަތުގެ ފައިސާއިން 110 ބިލިއަން ރުފިޔާ ޚަރަދުކޮށް ހުސްކޮށްލީ ރާއްޖޭގެ އެއްވެސް ރަށެއްގައި އެއްވެސް ޕްރޮޖެކްޓެއް ކުރިއަށް ނުގެންގޮސް ކަމަށެވެ.

ޣަފޫރު ވިދާޅުވީ 110 ބިލިއަން ރުފިޔާ ދުއްވާލައިގެން މި ސަރުކާރަށް ކުރެވިފައި ހުރި ހަމަ އެކަނި ކަމަކީ އެއް ނަމްބަރު ފާލަން ހެދުން އެކަނި ކަމަށެވެ. ދެން ކުރީ ހުސް ވައްކަން ކަމަށް އޭނާ ވިދާޅުވި އެވެ. އަދި މި ސަރުކާރުން ދަނީ މި ގައުމު ލޫޓުވަމުން ކަމަށާއި އެހެންކަމުން ގައުމެއް ލޫޓުވަމުން ދާއިރު ބަލަން ތިބެގެން ނުވާނެ ކަމަށް ޣަފޫރު ވިދާޅުވި އެވެ.

މި ސަރުކާރުން ސްޕްރީމް ކޯޓަށް އަތްބޭނި ފަހުން ފަހަރަކު މުއައްސަސާއެއް ހަލާކުކުރަމުން ދާނެކަން ދަންނަންޖެހޭ ކަމަށާއި އެގޮތުން މިއަދު މިއޮތީ މިޑިއާ ސަރުކާރުގެ ބާރުގެ ދަށަށް ގެނައުމުގެ މަސައްކަތް ކަމަށެވެ.

މި ސަރުކާރުން ކުރަމުން މި ގެންދާ ކަންކަން ނުހުއްޓުވައި ފަހަތަށް ޖެހިގެން ތިބެއްޖެ ނަމަ ދެން މި ގައުމު އަތު ނުވާނޭ ކަމަށާއި މި ސަރުކާރު ހަމަމަގަށް އެޅުވުމަށް ނުކުންނަން އެބަޖެހޭ ކަމަށް އޭނާ ވިދާޅުވި އެވެ.