މާލެ، ވިލިމާލެ، ތިލަފުށި އަދި ގުޅީފަޅު ގުޅުވާލާ ތިލަމާލެ ބްރިޖުގެ އެންމެ އުސް ޕްރީކާސްޓް ނެވިގޭޝަން ސްޕޭން ސެގްމަންޓް މިއަދު ގާއިމުކޮށްދި އެވެ.

އެއާއެކު، މިއީ ދުނިޔޭގެ އެންމެ އުސް މިބާވަތުގެ ޕްރީކާސްޓް ކަމަށް އިންޑިއާ ހައިކޮމިޝަނުން ބުނެ އެވެ.

މި ޕްރީކާސްޓް ސެގްމަންޓްގެ އުސްމިނަކީ 8.2 މީޓަރު ކަމަށާއި، ފުޅާމިނަކީ 25.3 މީޓަރު ކަމަށް އެ ކޮމިޝަނުން ބުނެ އެވެ. އަދި މީގެ ބަރުދަނަކީ 216.04 މެޓްރިކް ޓަނު ކަމަށް ވެސް ބުނެފައިވެ އެވެ. މި ސެގްމަންޓް ގާއިމުކުރެވުމަކީ އިންޖިނިއަރިން ދާއިރާއަށް ލިބުނު ފާހަގަކޮށްލެވޭ ކުރިއެރުމެއްގެ ގޮތުގައި ހައިކޮމިޝަނުން ސިފަކޮށްފައިވެ އެވެ.

މިކަމާއި ގުޅިގެން ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވަނީ އުފާފާޅުކުރައްވައި، ކަނޑައެޅިފައިވާ ތާވަލާ އެއްގޮތަށް މަޝްރޫޢު ނިންމޭނެކަމުގެ އުންމީދު ފާޅުކުރައްވާފަ އެވެ. އަދި މިނިސްޓަރު ވަނީ އިންޑިއާގެ ސަފީރު ޖީ. ބަލަސުބްރަމާނިއަމްގެ އެހީތެރިކަމަށް ޝުކުރު އަދާކުރައްވާފައިވެ އެވެ.

ތިލަމާލެ ބްރިޖު މަޝްރޫޢަކީ އިންޑިއާގެ އެގްޒިމް ބޭންކުން ދޭ 400 މިލިއަން ޑޮލަރުގެ ލޯނު އެހީގެ ދަށުން ކުރިއަށްގެންދާ މަޝްރޫއެކެވެ. މި މަޝްރޫއުގެ މަސައްކަތް 2021 ވަނަ އަހަރުގެ އޯގަސްޓު މަހު އިންޑިއާގެ އެފްކޮންސް ކުންފުންޏާ ހަވާލުކުރެވުނެވެ. ނަމަވެސް މަސައްކަތް އުޅެނީ ޝެޑިއުލަށް ވުރެ އެތައް ދުވަހެއް ފަހަތުގަ އެވެ.