އާމިރުގެ ވާހަކައަކީ ވިސްނާލަން ޖެހޭ ވަރުގެ ވާހަކައެއްކަން މަލަކާ އަށް އެނގެއެވެ. ޖަވާބު ދެވޭ ގޮތަކުން ކޮންމެ ފަދަ ނަތީޖާއަކާ ކުރިމަތިވެދާނެ ކަމެއްކަން މަލަކާއަށް އެނގެ އެވެ.

"އަހަރެންގެ އަތުގައި ހުރި މައުލޫމާތެއް ވެއްޖެއްޔާ ހުންނާނީ އޮފީހުގައެއްނު" އާމިރުގެ ވާހަކައަށް ވިސްނަމުން މަލަކާ ބުންޏެވެ. "އެ މައުލޫމާތު އޮފީހުން ހޯދޭނެތާ" މަލަކާ އުޅުނީ ދެކެވެމުންދާ ވާހަކަ އެހާ ސީރިއަސް ކޮށް ނުނަގާ ކަމަށް ދައްކާށެވެ. "މަލަކާ މިހިރީ ޗުއްޓީގައެއްނު"

އާމިރު އުޅުނީ މަލަކާއަށް ވިސްނާ ދެވޭތޯ އެވެ. ކަމުގެ މުހިންމުކަމާއި ސީރިއަސްކަން އަންގާދެވޭތޯ ބެލި އެވެ. ވަޒީފާގެ ކުރިމަގަށް ވިސްނުމަށް ވެސް އެދުނެވެ.

ރެސްޓޯރެންޓުން ނިކުމެގެން ދިޔައިރު މަލަކާގެ ހިތަށް ދިޔައީ ވަރަށް ބޮޑު ނުތަނަވަސްކަމެއް ވެރިވަމުންނެވެ. އަލީމްއާ ވަކިވެ ކައިވެނި ރޫޅުމުން ލިބުނު ފަޅުކަން ހިތުން ފިލައިގެނެއް ނުދެ އެވެ. ވަރީގެ ކަންތައް ފަސޭހަކޮށް ދިޔަކަމުގައި ވިޔަސް ކުރިޔަށް އޮތް ދަތުރުގެ އުނދަގޫ ކަން މަލަކާއަށް އަންނަނީ އިހުސާސްވަމުންނެވެ.

މަލަކާ ދިރިއުޅެމުން އަންނަނީ އަލީމްއާ ދެމީހުން އެކުގައި ގަތް އެޕާޓްމެންޓެއްގަ އެވެ. އެޕާޓްމެންޓްގައި މިވަގުތު މަލަކާ އެކަނި އުޅެމުން ދިޔަކަމުގައި ވިޔަސް އެތަން ދޫކޮށްލާކަށް އަލީމް ވެސް ބޭނުމެއް ނުވެ އެވެ. ފްލެޓް ބޭނުންނަމަ މަލަކާއަށް ޖެހެނީ އަލީމަށް އަގު ދައްކާށެވެ. އެކަމަށްޓަކައި ލޯނެއް ނަގަން ޖެހެ އެވެ. ވަޒީފާގެ ކުރިމަގު އޮތް ގޮތުން އެފަދަ ލޯނެއް ނެގުމަކީ މިވަގުތު މަލަކާއަށް ކުރެވޭ ވަރުގެ ކަމަކަށްނުވެ އެވެ.

ބުރަހެލި ސިކުނޑިއަކާއެކު މަލަކާ ގެއަށް ވަދެ ލިވިންގް ރޫމުގެ ސޯފާގައި ޖައްސާލި އެވެ. ޓީވީ އޮން ކޮށްލި އެވެ. މައިގަނޑު ޚަބަރެއްގެ ގޮތުގައި ފެނުނީ ގަބޫލުކުރަން ދަތި މަންޒަރެކެވެ. މަލަކާގެ އޮފީހަށް އެންޓި ކޮރަޕްޝަން ކޮމިޝަނާއި ފުލުހުން އެކުގައި ވަދެގަތީ އެވެ. ބަލަމުންދާ މައްސަލައަކަށް ބޭނުންވާ ހެކި ހޯދުމަށެވެ. ޚަބަރުތައް ނިއުޅެމުން ދިޔަ ވަރަކަށް މަލަކާގެ ހިތުގެ ވިންދު ދިޔައީ އަވަސްވަމުންނެވެ. އެންމެފަހުން މިނިސްޓަރު ސަސްޕެންޑު ކުރި ޚަބަރާ ހިސާބުން އިތުރަށް ޓީވީ ނުބަލައި މަލަކާ ވަނީ ކޮޓަރިއަށެވެ.

ޓޫރިޒަމް މިނިސްޓަރު އިގުބާލް އަފީފަކީ ޒުވާން، ތޫނުފިލި ހީވާގި ބޭފުޅެކެވެ. މިނިސްޓަރު ކަމަށް ވަޑައިގެންނެވީ މާބޮޑު ތަޖުރިބާއެއް ހުރެގެން ނޫންކަމުގެ ޝަކުވާ ބޮޑުވި އެވެ. އެހެން ނަމަވެސް ސިޔާސީގޮތުން އާއިލީ ނުފޫޒާއެކު މިނިސްޓަރު މަސައްކަތް ކުރައްވަމުން ގެންދެވި ގޮތާމެދު ފާޑު ކިއުންތައް އަމާޒުވި އެވެ. ރަށްތައް ދޫކުރަމުން ދިޔަގޮތާ މެދު ފާޑުކިޔުންތައް އަމާޒުވަމުން ދިޔަ ކަމުގައި ވިޔަސް ހީވެފައި އޮތީ މިނިސްޓަރާ ބެހެވޭނެ ބަޔަކު ނޫޅޭނެކަމުގަ އެވެ. މަޖިލިސްގެ ތެރެއިންނާއި ޚުދު ރައީސްގެ ބެކަޕް މިނިސްޓަރަށް އޮތްކަމުގައި ފެނެ އެވެ. އެހެންކަމުން މިނިސްޓްރީ ތެރޭގައި ކަންތައް ހިނގަމުންދިޔަ ގޮތުން ޑީލްތަކުގެ އަޑީގައި ނުފޫޒުގަދަ ބަޔަކު ތިބި ކަމާމެދު އަޑުތައް އައީ ފެތުރެމުންނެވެ.

މަލަކާގެ ހަނދާނަށް އައީ ޓޫރިޒަމްގެ ވަރަށް ފުންނާބު އުސް ބޭފުޅުންކޮޅަކާއެކު މިނިސްޓަރު ބޭއްވި ބައްދަލުވުމެކެވެ. އެ ބައްދަލުވުމުގައި އެބޭފުޅުން އެދިވަޑައިގެންނެވި އިތުރު ޓެކްސްތައް ނުނެގުމަށެވެ. ރަށްތައް ކުއްޔަށް ދިނުމުގައި ދެފުށް ފެންނަ ގޮތަށް ކުރިޔަށް ގެންދިއުމަށެވެ. މިނިސްޓަރު އެ ހުރިހާ ވާހަކައަކަށް އެއްބަސްވެވަޑައިގެންނެވި އެވެ. އެހެން ނަމަވެސް މީޓިން ނިމުމަށްފަހު މިނިސްޓަރު މަލަކާ އާ ދެއްކެވި ވާހަކައަކީ މުޅިން ތަފާތު ވާހަކަތެކެ އެވެ. އެ ވާހަކަތަކަށްފަހު އޮފީހުގެ ސިޔާސީ ކަންތައްތަކާ މަލަކާ އުޅުނީ ދުރުގަ އެވެ.

މަލަކާ ގުޅީ އޮފީހުގެ ރައްޓެއްސެއް ކަމަށްވާ ޒީނާއަށެވެ. ޒީނާ ބުނީ މަލަކާގެ ކޮމްޕިއުޓަރު ވެސް ބަލާހާވަމުން ގެންދާ ކަމަށެވެ.

މަލަކާގެ ކޮމްޕިއުޓަރުގައި ހުންނާނީ އޮފީހުގެ ރަސްމީ ލިޔެކިޔުންތަކެވެ. އަޑިއަޑިން ހަދާފައި ހުރި ޑީލްތަކެއްގެ މައުލޫމާތު އެއަކު ނުހުންނާނެ އެވެ. ހަގީގަތުގައި ހޯދަން ބޭނުންވަނީ ކޮން މައުލޫމާތެއްކަން މަލަކާއަށް އެނގެ އެވެ. އެ ލިޔެކިޔުންތައް ނުރަސްމީ ޗެނަލަކުން މަލަކާގެ އަތަށް އެރީ އޮޅުމަކުންނެވެ. އެހެން ނަމަވެސް އެ ވާހަކަ ދައްކާކަށް އަދި މަލަކާ ބޭނުމެއް ނޫނެވެ.

މަލަކާއަށް ފެންނަނީ އޭނާގެ ހަޔާތުގެ ނާ، މިސްރާބު އޮޅި ބެހެމުން ދާތަނެވެ. ވަޒީފާގެ ކުރިމަގު ގާތްގަނޑަކަށް އޮތީ ނިމިފަ އެވެ. ވަޒީފާގެ އިތުރު ފުރުސަތެއް ފަހިވެދާނެ ކަމުގެ އުންމީދު ވެސް މިހާރު އަންނަނީ ފަނޑުވަމުންނެވެ.

މަލަކާ ސިއްސައިގެން ދިޔައީ ފްލެޓުގެ ދޮރުގަ ވަރަށް ބާރަށް ޓަކި ޖެހުމުންނެވެ. އަވަސް އަވަހަށް ގޮސް ދޮރު ހުޅުވި އިރު ދޮރުމަތީގައި ތިބީ ފުލުހުންގެ ދެ އޮފިސަރުންނެވެ. (ނުނިމޭ)