ގާނޫނުއަސާސީއަށް ގެނައި އިސްލާހު ދެމި އޮންނަ މުއްދަތުގައި މަޖިލިސް މެމްބަރެއްގެ ގޮނޑި ގެއްލިއްޖެނަމަ އެ މެންބަރަކު ތަމްސީލުކުރި ދާއިރާއަށް އަލުން އިންތިހާބު ކުރަން އެހީތެރިވުމަށް އެމްޑީޕީގެ ގައުމީ މަޖިލީހުން މިރޭ އިގުރާރުވެއްޖެ އެވެ.

ކާނިވާ ސަރަހައްދުގައި މިރޭ ބޭއްވި އެމްޑީޕީގެ ގައުމީ މަޖިލީހަށް ކޮލަމާފުށި ދާއިރާގެ ރައީސް މަހުފޫޒު ސައީދު ހުށަހެޅުއްވި އެ ގަރާރު ފާސްވީ ހާޒިރުވި މެމްބަރުންގެ އިއްތިފާގުންނެވެ.

މަހުފޫޒު ހުށަހެޅި އެ ގަރާރުގައި ވަނީ ރައްޔިތުންގެ މަސްލަހަތުގައި އެމްޑީޕީން ކުރަމުންދާ މަސައްކަތުގައި ބައިވެރިވުމުގެ ގޮތުން، އެ މެންބަރު ނިސްބަތްވާ ޕާޓީން ވަކިވެ އެމްޑީޕީއާ ގުޅުމުން ގޮނޑި ގެއްލުމުން ވެސް އެ މެންބަރަކު އަލުން އިންތިހާބު ކުރުމަށް އެހީވާންޖެހޭނެ ކަމަށެވެ.

އެ ގަރާރުގައި ބުނެފައި ވަނީ ގާނޫނުއަސާސީއަށް ގެނައި ބަދަލަކީ ރައްޔިތުންގެ ބާރުވެރިކަން ނިގުޅައިނަގެ، ރައްޔިތުންގެ މަޖިލީހުގެ މެންބަރުން ރައްޔިތުންގެ މަސްލަހަތުގައި މަސައްކަތްކުރުމަށް އޮތް މިނިވަން އިހުތިޔާރު ވެސް ނިގުޅައިގަންނަ ބަދަލެއް ކަމަށެވެ.

ގާނޫނު އަސާސީއަށް ގެނައި ބަދަލު ގާނޫނު އަސާސީގެ 75 ވަނަ މާއްދާއާ ހިލާފު ކަމަށް ވެސް އެ ގަރާރުގައިވެ އެވެ.

ގާނޫނުއަސާސީއަށް މި ގެނައި ބަދަލު އިހު އޮތް ގޮތަށް ރުޖޫއަކުރުމާ ހަމައަށް، މުޅި ރާއްޖޭގެ އެކި ކަންކޮޅުތަކުގައި އިހުތިޖާޖު ކުރުމުގެ ގޮތުން އެކިއެކި ސިޔާސީ ހަރަކާތްތައް ހިންގުމަށް ވެސް އެ ގަރާރުގައިވެ އެވެ.

ގާނޫނު އަސާސީއަށް ގެނައި އެ ބަދަލާ ގުޅޭ މައްސަލަ ސުޕްރީމް ކޯޓަށް ވަނީ ހުށަހަޅާފަ އެވެ. ނަމަވެސް އެ މައްސަލަ ނުބަލައި އެ ކޯޓު ވަނީ ރިސެސްއަށް ގޮސްފަ އެވެ.