ރައްޔިތުންގެ މަޖިލީހުގެ މެމްބަރަކު ނިސްބަތްވާ ޕާޓީއަކުން އެ މެމްބަރަކު ވަކިކޮށްފިނަމަ، ގޮނޑިގެއްލޭނެ ކަމަށް ގާނޫނުުއަސާސީގައި ހިމަނަން ހުށަހެޅި އިސްލާހު ފާސްވެއްޖެ އެވެ.

ރައީސް ޑރ. މުހައްމަދު މުއިއްޒުގެ އެއްގެވުމަށް ކުއްލިގޮތަކަށް އަވަސް އަރުވާލައިގެން މިއަދު ފާސްކުރި އެ އިސްލާހުތައް ސަރުކާރުގެ ފަރާތުން ހުށަހެޅުއްވީ ހުޅުދޫ ދާއިރާގެ މެމްބަރު މުހައްމަދު ޝާހިދެވެ. އެ ބިލް ދިރާސާކުރީ މުޅި މަޖިލީހުގެ ކޮމިޓީއަކުންނެވެ.

ކޮމިޓީން ނިންމި ގޮތަށް އެ ބިލު ފާސްކުރަން ފެނޭތޯ ނެގި ވޯޓުގެ ނަތީޖާއަށް ބަލާއިރު، ޖަލްސާއަށް ހާޒިރުވި 91 މެންބަރުންގެ ތެރެއިން 78 މެންބަރުންގެ ވޯޓުން ވަނީ އެ ބިލް ފާސްކުރަން ލިބިފަ އެވެ. އެ ބިލް ފާސްކުރަން ނުފެންނަ ކަމަށް ވޯޓު ދެއްވީ 13 މެންބަރުންނެވެ. އެއީ އެމްޑީޕީގެ 12 މެމްބަރުންގެ އިތުރުން އައްޑޫ މީދޫ ދާއިރާގެ މެމްބަރު އަބްދުއްރަހްމާނެވެ.

ގާނުނުއަސާސީ އިސްލާހު ކުރުމަށް ބޭނުންވަނީ މަޖިލީހުގެ ޖުމްލަ މެންބަރުންގެ އަދަދު ކަމަށްވާ 93 ބޭފުޅުންގެ ހަތަރު ބައިކުޅަ ތިން ބައެވެ. އެއީ 70 މެންބަރުންނެވެ.

މަޖިލިސް މެމްބަރުންގެ ގޮނޑި ގެއްލޭ އިސްލާހުގެ އިތުރުން އެ ބިލްގައި ހިމެނޭ ކަންތައްތަކުގެ ތެރޭގައި ރާއްޖޭގެ ސަރަހައްދަށް ބަދަލެއް ގެނައުމުގެ ކުރިން ރައްޔިތުންގެ މަޖިލީހުގެ ތިންބައިކުޅަ ދެބައިގެ ރުހުން ހޯދަން ޖެހޭ ގޮތަށް ހެދުން ހިމެނެ އެވެ.

އެ ބިލަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް އިސްލާހެއް ހުށަހެޅުއްވި އެވެ. އެއީ މަޖިލިސް މެމްބަރުކަމުން ވަކިކުރެވޭނީ ދާއިރާގެ ރައްޔިތުންގެ ވޯޓަކުން ކަމުގައި ކަނޑައެޅުމަށެވެ. ނަމަވެސް އެ އިސްލާހު ފާހެއްނުވި އެވެ.