"މި ގައުމުގެ މިނިވަންކަމަށްތަކައި، ނުހައްގުން ޖަލުގައި 110 ވަނަ ދުވަސް މިހާރު ހޭދަ ކުރައްވަމުންދާ އަޅުގަނޑުމެންގެ ލޮބުވެތި ރައީސް، އަބްދުﷲ ޔާމީން، ދެޕާޓީގެ ލީޑަޝިޕްގެ އެންމެހާ ވެރިން" މިއީ 22 އޮގަސްޓް 2022 ވަނަ ދުވަހު އައްޑު އަތޮޅު ހުޅުމީދޫ ރައްޔިތުންނާ ބައްދަލު ކުރައްވާ އޭރުގެ ރިޔާސީ ކެންޑިޑޭޓް މިހާރުގެ ރައީސް މުހައްމަދު މުއިއްޒުގެ ވާހަކަފުޅު ފެށުން ގެންނެވި ގޮތެވެ. އެމަނިކުފާނު އެންމެ ފުރަތަމަ ސަލާމުގެ އިބާރާތް ރައްދުކުރެއްވީ އޭރު ޖަލުގެ ތޭރިތަކުގެ ފަހަތުގައި ހުންނެވި ކުރީގެ ރައީސް ޔާމީނަށެވެ. އެ ދުވަހުގެ އެޖަލްސާ ފަދައިން އެމަނިކުފާނުގެ ކެމްޕެއިން ހުރިހާ ޖަލްސާއެއްގައި ވެސް އަމަލު ކުރެއްވީ އެގޮތަށެވެ.

ސަލާމަށްފަހު ރައްޔިތުން އެމަނިކުފާނަށް ދެންނެވި ހޫނު މަރުހަބާއަށް އިޝާރަތް ކުރައްވައި ޑރ. މުއިއްޒު ވިދާޅުވީ އެއީ ރައީސް ޔާމީންގެ ތަރައްގީއަށް ރައްޔިތުން ކިޔާ މަރުހަބާއެއްކަން ގަބޫލުކުރައްވާ ކަމަށެވެ. އެހެންކަމުން އެމަނިކުފާނު ހުޅުމީދޫގެ ރައްޔިތުންގެ ފަރާތުން އެދިވަޑައިގެންނެވީ ނުހައްގުން އަނިޔާލިބެމުންދާ ރައީސް ޔާމީން މިނިވަން ކުރުމަށްޓަކައި އެމަނިކުފާނަށް ތާއީދު ކޮށްދެއްވުމަށެވެ. ރައީސް ޔާމީން މިނިވަންކުރުމަށްޓަކައި އެމަނިކުފާނަށް ތާއީދު ކޮށްދިނުމަށް ރައްޔިތުންގެ ގާތުން އެދިވަޑައިގެންނެވުމަށްފަހު އެ ރައްޔިތުންނަށް މިހާރުގެ ރައީސް މުއިއްޒު ވެވަޑައިގެންނެވީ ބޮޑު ވައުދެކެވެ. ވިދާޅުވި އެވެ.

"އަޅުގަނޑުމެންނަށް، އެމަނިކުފާނު ސިޔާސީ ގޮތުން ހައްޔަރު ކޮށްފައި އެހުރިހުރުން ނިމުމަކަށް ގެނެވޭނީ ސިޔާސީ ބާރުވެރިކަން ތިޔަބޭފުޅުންގެ އެހީތެރިކަމާއެކު ލިބިގެން. އެހެންވީމާ ތިޔަ ބޭފުޅުން އެ އެހީތެރިކަން އަޅުގަނޑަށް ދެއްވައިފިނަމަ އަޅުގަނޑު ދޭ ޔަގީންކަމަކީ ގާނޫނީ ހަމަތަކުގެ މަތީން އެމަނިކުފާނު ތިޔަބޭފުޅުންގެ ގާތަށް މިނިވަން ކޮށްގެން ގެނެސްދޭނަމޭ،"

ވެރިކަން ލިބިވަޑައިގެންފިނަމަ ރައީސް ޔާމީން މިނިވަންކުރައްވާނެކަމުގެ ވައުދަކީ ރައީސް މުއިއްޒުގެ ކެމްޕޭނުގެ ނާރެހެވެ. އެމަނިކުފާނު ރައްޔިތުންގެ ކުރިމަތީގައި ވެވަޑައިގެންނެވި އެންމެ ބޮޑު ވައުދުފުޅެވެ. ވެރިކަމަށް މިއަދު އެއް އަހަރު ފުރުނުއިރު ވެސް ރައީސް ޔާމީން ހަގީގަތުގައި މިނިވަނެއް ނުވެ އެވެ. ރައީސް މުއިއްޒުގެ ދޫފުޅުން ސިޔާސީ ދައުވާތަކެއް ކަމަށާއި ނުހައްގު ހުކުމްތަކެއް ކަމުގައި ވިދާޅުވި ދައުވާތައް އަލުން ބަލުން ކޯޓަށް ވައްދައި ޝަރީއަތްތައް ގެންދަނީ ކުރެވެމުންނެވެ.

ރައީސް ޔާމީން މިނިވަން ކޮށްދެއްވާނެކަމުގެ ވައުދަށްފަހު އެ ޖަލްސާގައި ރައީސް މުއިއްޒު ދެއްކެވީ އައްޑުއަށް ކުރިމަތިވެފައި އޮތް ވަޒީފާގެ ގޮންޖެހުންތަކުގެ ވާހަކަ އެވެ. އެ މައްސަލައަށް ހައްލު ހޯއްދަވައި ދެއްވާނެ ކަމުގައި ވިދާޅުވަމުން ޓޫރިޒަމްގެ އެތައް ގިނަ އިތުރު މަޝްރޫއުތަކެއް ފަށްޓަވާ ދެއްވާނެ ކަމަށް ވިދާޅުވި އެވެ. އެންމެ ސާފު ސީދާ ބަހުން ދެއްކެވީ ބަންދު ކޮށްފައި ހުރި ރިސޯޓުތައް ހުޅުވުމުގެ ވާހަކަ އެވެ.

"ޝަންގްރިއްލާ ރިސޯޓް ވިލިނގިލި ރިސޯޓުގެ ވާހަަ ދެކެވިއްޖެ. އަޅުގަނޑުމެން އިރާދަކުރެއްވިއްޔާ އެކަމަށް ވަރަށް ސަމާލުކަން ދީގެން ފުރަތަމަ އަހަރު، 2024 ގެ ކުރީކޮޅު، އިރާދަ ކުރެއްވިއްޔާ އެރިސޯޓު އަނބުރާ އޮޕަރޭޝަނަށް ގެނެސްދޭނަން" ރައީސް މުއިއްޒު ހުޅުމީދޫ ރައްޔިތުންގެ ކުރިމަތީގައި ވައުދުވެ ވަދައިގެންނެވި އެވެ.

އެމަނިކުފާނު އެވިދާޅުވި 2024 ގެ ކުރީކޮޅު ހިނގައްޖެ އެވެ. ވެރިކަމަށް އަހަރު ވެސް ފުރުނީ އެވެ. ޝަންގްރިއްލާ އޮތީ އޮތްގޮތަށެވެ.

ސ. ހުޅުމީދޫގައި ބޭއްވި ޖަލްސާގައި ރައީސް މުއިއްޒު ދެން އެންމެ ގަދައަށް ފާހަގަކުރެއްވީ އެ ދެރަށުގެ ރައްޔިތުންގެ އިހުސާސްތަކާ ގުޅިފައިވާ އައްޑޫގެ ދެފަރު ގުޅުވާލާ ބުރިޖުގެ ވާހަކަ އެވެ. އެ ބްރިޖްގެ ދިރާސާގެ މަސައްކަތް ވެސް އެމަނިކުފާނުގެ ވެރިކަމުގެ ފުރަތަމަ އަހަރު ކުރައްވާނެ ކަމަށް ވިދާޅުވެ ބްރިޖް އެޅޭނެކަމުގެ ޔަގީންކަން ދެއްވީ ރައީސް ޔާމީން އެޅުއްވި ހުޅުމާލޭގެ ބްރިޖުން މިސާލު ނަންގަވަމުންނެވެ.

އައްޑުއާއި ޖެހިގެން އޮތް ފުވައްމުލަކުގައި ދެއްކެވި ވާހަކަފުޅުގައި ރައީސް މުއިއްޒު ވަނީ އެ ރަށަށް ބޭނުންވާ ވަރަށް ގިނަ ކަންތަކެއް ކޮށްދެއްވާނެ ކަމަށް ވިދާޅުވެފަ އެވެ. ބައިނަލްއަގުވާމީ ފެންވަރުގެ ހޮސްޕިޓަލެއް ތަރައްގީކުރެއްވުމާއި އެންމެ ޒަމާނީ ވަސީލަތްތަކާއެކު ބަނދަރު ބޮޑުކޮށް ދެއްވުމާއި އާޓިފިޝަލް ބީޗް ގާއިމުކޮށް ދެއްވާނެ ކަމަށް ވިދާޅުވީ ވަކި ޓައިމްލައިނެއް ނެތި އެވެ. އެހެންކަމުން އެ ވައުދު ފުއްދެވުމަށް އަދި ހަތަރު އަހަރު ބާކީ އޮތް ކަމަށް ބެލެވިދާނެ އެވެ.

ފުވައްމުލަކުގައި ދެއްކެވި ވާހަކަފުޅުގައި ރައީސް މުއިއްޒު ވަނީ ދައުލަތުން ދެމުންގެންދާ ސޯޝަލް ސެކިއުރިޓީއާ ގުޅޭ ބެނިފިޓްތަކުގެ ވާހަކަ ވަރަށް ތަފުސީލު ކޮށް ދައްކަވާފަ އެވެ. ނުކުޅެދުންތެރިކަން ހުންނަ މީހުންނަށް ދޭ އެލަވަންސާއި އުމުރުން ދުވަސްވީ މީހުންނަށް ދޭ އެލަވަންސް ބޮޑު ކުރައްވާނެ ކަމަށް ވިދާޅުވުމަށްފަހު އެކަނިވެރި މައިންނާއި އެކަނިވެރި ބަފައިންނަށް ދޭ އެލަވަންސް ކޮންމެ ކުއްޖަކަށް 3،000 ރުފިޔާގެ މަގުން 12،000 ރުފިޔާއަށް ވުރެ މަތިނުވާ ވަރަށް ދެއްވާނެ ކަމަށް ވިދާޅުވި އެވެ.

ރައީސް މުއިއްޒުގެ ވައުދުތަކާއި ކެމްޕޭން ވާހަކަފުޅުތައް ވަނީ ވަރަށް ރީތިކޮށް ފޮތެއްގެ ސިފައިގައި އެކުލަވާލާފަ އެވެ. އޯޑިއޯއާއި ވީޑީއޯ ހިމެނޭހެން އެފޮތް އެކުލަވާލީ 35 މެނަބަރުންގެ ކުޅަދާނަ ޓީމަކުންނެވެ. އެހެންކަމުން އެމަނިކުފާނު ކެމްޕޭނަށް ކުރެއްވި ވައުދުތަކާއި އަހުދުތައް ވަނީ ބޭނުން މީހަކަށް ބޭނުން ވަގުތަކު ބަލާލެވޭނެ ފެންވަރަށް ރައްކާކުރެވިފަ އެވެ.

އެތައް ބައިވަރު ވައުދުތަކަކާއި ރައީސް ޔާމީންގެ ހުސްގޮނޑިއާއި އެމަނިކުފާނުގެ ވެރިކަމުގެ ކާމިޔާބު ފަސްއަހަރުގެ ތަސައްވުރާއެކު ކުރި ކެމްޕޭނަށް ފަހު އިންތިޚާބު ކާމިޔާބުވުމާއެކު އުފާފާޅު ކުރުމަށް ބޭއްވި ޖަލްސާގައި ހުސްގޮނޑި އެއްފަރާތްކޮށްލައި ރައީސް ޔާމީން މިނިވަންކުރުމުގެ ވާހަކަ ނުދެއްކުމަށް ސަޕޯޓަރުންގެ ގާތުގައި ވިދާޅުވި ހިސާބުން ފެށިގެން ރައީސް މުއިއްޒުގެ ވައުދުތަކާމެދު ފާރަވެރިވާ ފަރާތްތަކުން ބުނަމުން ގެންދަނީ އެމަނިކުފާނުގެ އެއްވެސް ވައުދެއް ނުފުއްދަވާ ކަމަށެވެ. އޭގެ ބަދަލުގައި ވައުދުތަކާ ދިމާ އިދިކޮޅަށް، ނުކުރައްވާނަމޭ ވިދާޅުވި ކަންތައް ކުރައްވަމުން ގެންދަވާ ކަމަށެވެ. އާސަންދައަށް ގެންނަމުންދާ ބަދަލުތަކާއި އެކިއެކި އެލަވަންސްތައް އުނިކުރަމުން ގެންދަވާގޮތާއި ސަބްސިޑީތަކާމެދު އަމަލުކުރައްވަން ނިންމެވި ގޮތުން ރައީސް މުއިއްޒުގެ ރިޔާސީ ވައުދުތަކާ ޚިލާފުވެވަޑައިގެންފި ކަމަށް ގިނަ ބަޔަކު އަންނަނީ ބުނަމުންނެވެ.