މަޝްހޫރު މެޑަމް ތުސޯޑްސް މިއުޒިއަމްގައި ބަހައްޓާފައި ހުރި ބޮލީވުޑްގެ އެކްޓަރު ރަންވީރު ސިންހްގެ ދެ ވެކްސް ސްޓެޗޫއެއް އޭނާ ދައްކާލައިފި އެވެ.

2019 ވަނަ އަހަރުގެ އައިފާ އެވޯޑްސްގައި ރަންވީރަށް "ދަ ފިއުޗާ އެވޯޑް" ލިބުމާއެކު އިއުލާން ކުރެވުނު އެ ދެ ސްޓެޗޫ އާއްމުންނަށް ދައްކާލެވިފައި މިވަނީ ހަތަރު އަހަރު ފަހުންނެވެ.

ރަންވީރުގެ ދެ ސްޓެޗޫއެއް ދައްކާލާފައިވާއިރު އެއް ސްޓެޗޫގައި އޭނާ ހުންނަނީ ކަޅު ކުލައިގެ ކޯޓު ފަޓުލޫނެއްގަ އެވެ. އަނެއް ސްޓެޗޫ ފެންނަނީ އެކި ކުލަތައް ހިމެނޭ ކުރުތާއެއްގަ އެވެ.

ރިޕޯޓުތައް ބުނާ ގޮތުގައި އެ ސްޓެޗޫތައް ފަރުމާކޮށް ޑިޒައިން ކުރުމުގައި ހުދު ރަންވީރު އަމިއްލައަށް މަސައްކަތް ކޮށްފައިވެ އެވެ. އެގޮތުން އެ ހެދުންތަކަކީ އޭނާގެ ހޮވުންތަކެކެވެ.

މިކަމާ ބެހޭ ގޮތުން ކުރި ޕޯސްޓެއްގައި ރަންވީރު ބުނީ ވަރަށް ކުޑައިރު މެޑަމް ތުސޯޑްްސް މިއުޒިއަމްއަކީ ކޮން އެއްޗެއްކަން މަންމަގެ ފަރާތުން އެނގުނު ކަމަށާއި އެތަނުގައި އޭނާގެ ސްޓެޗޫއެއް ހުރުމަކީ އަބަދު ވެސް ހުވަފެނެއް ކަމަށެވެ.

އެ ދެ ސްޓެޗޫ ކައިރީގައި ރަންވީރު ހުއްޓިހުރެ ނަގާފައިވާ ފޮޓޯތަކެއް އާއްމުވެފައިވާއިރު އެއިން އަސްލު ރަންވީރަކީ ކޮބާކަން ފާހަގަކުރަން އުނދަގުލެވެ.

ރަންވީރުގެ އިތުރުން މެޑަމް ތުސޯޑްސް މިއުޒިއަމްގައި ސްޓެޗޫ ހުރި ބޮލީވުޑް ތަރިންގެ ތެރޭގައި ޝާހްރުކް ޚާން، ސަލްމާން ޚާން އަދި އާމިރު ޚާން ހިމެނެ އެވެ.