މިހާރު ސިނަމާތަކުގައި ދައްކަމުން އަންނަ ރަންބީރު ކަޕޫރުގެ އެންމެ ފަހުގެ ފިލްމު "އެނިމަލް"ގެ ކޮޕީއެއް އޮންލައިންކޮށް ލީކު ކޮށްލައިފި އެވެ.

އިންޑިއާގެ ނޫސްތަކުން ބުނާ ގޮތުގައި ރިލީޒް ކުރިތާ ދެތިން ދުވަސް ނުވަނީސް މިހާރު "އެނިމަލް"ގެ ސްކްރީން ކޮޕީއެއް އިންޓަނެޓްގެ އެކި ވެބްސައިޓްތަކުން ލިބެން އެބަހުއްޓެވެ.

އޭގެ އިތުރުން ފިލްމުގެ ނުސާފު ކޮޕީއެއް ގިނަ ބަޔަކު ބޭނުންކުރާ ވަޓްސްއެޕްގައި ވެސް ދައުރުވަމުން އަންނަ ކަމަށް ހަބަރުތައް ބުނެ އެވެ.

އެނިމަލް ނެރުނުތާ ދެ ދުވަސްވީއިރު އެ ފިލްމަށް އާއްމުންގެ ލޯބި އަންނަނީ ލިބެމުންނެވެ. އެގޮތުން ފުރަތަމަ ދުވަހު އެކަނި ވެސް 61 ކްރޯޑް ރުޕީސްގެ އާމްދަނީއެއް ލިބިފައިވެ އެވެ.

މިއީ މިއަހަރުގެ ރެކޯޑް އާމްދަނީއެއް ހޯދާފައިވާ ޝާހްރުކް ޚާންގެ ޕަތާންއަށް ފުރަތަމަ ދުވަހު ލިބުނު އާމްދަނީއަށްވުރެ ވެސް ބޮޑު އާމްދަނީ އެކެވެ.

އެނިމަލްގައި ރަންބީރުގެ އިތުރުން ބޮބީ ޑިއޯލްއާއި ރަޝްމިކާ މަންދަނާ ފެނިގެންދެ އެވެ.