ބޮލީވުޑްގެ ތަރި ރަންބީރު ކަޕޫރުގެ އެންމެ ފަހުގެ ފިލްމު "އެނިމަލް" އިއްޔެ ސިނަމާތަކުގައި ދައްކަން ފަށާފައިވާއިރު އެ ފިލްމަށް ގިނަ ބައެއްގެ ތައުރީފު އޮހެން ފަށައިފި އެވެ.

ބޮލީވުޑްގެ ފިލްމުތައް ރިވިއުކުރާ ފަރާތްތަކުން ބުނާ ގޮތުގައި މި ފިލްމަކީ މިހާތަނަށް ނުކުތް ރަންބީރުގެ އެންމެ މޮޅު ފިލްމެވެ. އެ ފިލްމުގައި އޭނާ ދައްކުވައިދީފައިވާ އެކްޓިން އެމީހުން ފާހަގަކުރި އެވެ.

ފިލްމުގެ ވާހަކައަށް ކޮންމެވެސް ވަރެއްގެ ފާޑުކިޔުން އަމާޒުވި ނަމަވެސް ޖުމްލަކޮށް ފިލުމުގެ ހުރިހާ މަސައްކަތެއްގެ ފެންވަރު ވެސް ރަނގަޅު ކަމަށް ރިޕޯޓުތައް ބުނެފައިވެ އެވެ.

މީގެ އިތުރުން މި ފިލްމަކީ މިއަހަރު ނުކުތް އެންމެ ކާމިޔާބު ފިލްމުތައް ކަމަށްވާ "ޕަތާން"އާއި "ޖަވާން" ފަހަތަށް ޖައްސާލުމުގެ ފެންވަރު ހުރި ފިލްމެއްގެ ގޮތުގައި ބައެއް މީހުން ސިފަކުރެ އެވެ.

ރަންބީރުގެ އިތުރުން ބޮބީ ޑިއޯލް މުހިއްމު ރޯލުތަކުން ފެންނަ "އެނިމަލް"ގެ ޝޯތައް މިހާރުވެސް ކުރިއަށް އޮތް ހަފްތާއަށް ފުރިފައިވާއިރު އެ ފިލްމަށް ބޮޑު އާމްދަނީއެއް ލިބޭނެ ކަމަށް ލަފާ ކުރެވެ އެވެ.