ގދ. މަޑަވެލީ މަސް ދޯންޏެއް 24 މީހުންނާއެކު އެ ރަށުގެ ފަޅުތެރޭގައި ކަރަންޓީންކޮށްފި އެވެ.

އެ ރަށު "ސީވޯލްޑް" ދޯނީގެ ފަޅުވެރިއެއް ކަމަށްވާ އަހުމަދު އަލީ "ހުރިހާ"އާ ވާހަކަ ދައްކަމުން ބުނީ އެ ދޯނި ކަރަންޓީނުކުރީ ހުޅުމާލެއަށް މަސްކިރަން އައިސްފައިވާތީ ކަމަށް ބުނެ ކަމަށެވެ.

"އަޅުގަނޑުމެން އެއް މަހާ ދިހަ ދުވަސް ވެއްޖެ މަހަށް ނުކުމުގެ އުޅޭތާ. އޮގަސްޓް 10 ގައި މަސްކިރާ އައިސް އެޅިން ހުޅުމާލެއިން. އެކަމަކު ދޯނިން އެއްވެސް މީހަކު ނުފައިބާ،" އޭނާ ބުންޏެވެ.

އަހުމަދު ބުނީ އެ ދޯނިން މަސްބާނައިގެން ހުޅުމާލެއަށް މިދިޔަ މަހުގެ 29 ދުވަހު މަސް ކިރުމަށްފަހު އިތުރު 12 ރަށަކަށް ގޮސް މަސްކިރާފައިވާ ކަމަށެވެ. ނަމަވެސް އެއިން އެއްވެސް ރަށަކަށް ވެސް ފަޅުވެރިން ނުފައިބާ ކަމަށް އޭނާ ބުންޏެވެ.

"އިއްޔެ ރޭ 7 ޖެހިއިރު މި ރަށަށް އައީ. އައިސް ފަޅުތެރޭ މަޑުކޮށްލިތަނާ ކައުންސިލުން ބުނީ ރަށަށް ނުފޭބޭނޭ،" އަހުމަދު ބުންޏެވެ. "ދޯނި ވަށައި ޕޮލިސް މިއޮތީ ޓޭޕް ދަމާ. ޒަރޫރީ ބޭނުންތައް ފުއްދަން ވެސް ރަށަށް ފޭބޭނެ ގޮތެއް ނެތް."

އޭނާ ބުނީ ދޯނީގައި ކާބޯތަކެއްޗާއި ފެން ވެސް ނެތް ކަމަށެވެ. އަދި ދޯންޏަށް އެއްވެސް އެއްޗެއް އެރުވޭނެ ގޮތެއް ވެސް ނެތް ކަމަށް އަހުމަދު ބުންޏެވެ.

"މި ދޯނީގެ 24 ފަޅުވެރިން މިތިބީ ހާލުގައި ޖެހިފައި. މަސްކިރި ލާރި ނުލިބޭތާ ދެ މަސްވެއްޖެ. ހަދާނެ ގޮތް ހުސްވެއްޖެ،" އޭނާ ބުންޏެވެ.

އަހުމަދު ދޯންޏަށް ކާބޯތަކެތި އެރުވޭނެ ކަމަށް ބުނެފައި ވަނީ ބޮއްކުރައެއް އަމިއްލައަށް ގެނެސް ގެން ކަމަށެވެ.

"އިންސާނިއްޔަތުކަން އޮންނަންވާނެހެން ހީވަނީ. އަޅުގަނޑުމެންނަށް އެބަ ފެނޭ އެހެން ރަށްރަށުގެ ދޯނިފަހަރުގެ މީހުން މި ރަށަށް އަރައި ފައިބައިގެންދާ ތަން. އެކަން ހުއްޓުވާނެ ބަޔަކު ނެތް،" އޭނާ ބުންޏެވެ.

މަޑަވެއްޔާއި ހޯޑެއްދޫން ކޮވިޑްގެ ކޭސްތަކެއް ފެނުމާ ގުޅިގެން ދެ ރަށް މިވަގުތު އޮތީ މޮނިޓަރިންގެ ހާލަތުގަ އެވެ.