ވެރިކަން ހިންގުން ބަރުލަމާނީ ނިޒާމަކަށް ބަދަލުކުރުމުގެ ގަރާރު ހުށަހެޅުން މަޑުޖައްސައިލީ އިތުރަށް އެކަމުގައި މަޝްވަރާކުރަން އެއްބަސްވެވިފައި އޮތުމުން ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ނަޝީދު ވިދާޅުވީ އެކަމާ ގުޅޭގޮތުން ފާއިތުވި ދެ ތިން ދުވަހު ރައީސް އިބްރާހީމް މުހައްމަދު ސޯލިހާ މަޝްވަރާ ކުރައްވާފައިވާނެ ކަމަށެވެ.

"އެހެންވީމާ އަޅުގަނޑު ދެކޭ ގޮތުގައި މި ގަރާރު މިތަނުގައި މިއޮތް ގޮތަށް އިހަށް ބާއްވާ އަޅުގަނޑުމެން މިއާ ދޭތެރޭގައި ބަހުސްނުކޮށް ރައީސުލްޖުމްހޫރިއްޔާ އާއި ތި ހުރިހާ ބޭފުޅުންނާ އެކުގައި މަޝްވަރާކޮށްގެން އަޅުގަނޑުމެންނަށް ރަނގަޅު ގޮތެއް، އެންމެންނަށް ގަބޫލުކުރެވޭ ގޮތަށް މިކަމުގައި ފެނިގެންދާނެ،" ނަޝީދު ވިދާޅުވި އެވެ.

އެމަނިކުފާނު ވިދާޅުވީ ރައީސް ސޯލިހާ މަޝްވަރާކޮށްގެން އެއްގޮތް އުސޫލުތަކެއް ހޯދޭނެ ކަމަށާއި އެކަމުގައި ޝައްކެއް ނެތް ކަމަށެވެ.

އެމްޑީޕީގެ ތެރޭގައި އުފެދިފައި މިހާރު ހުރި ހިޔާލުތަފާތުވުންތައް އެއްގޮތް ކުރަން ކުރިއަށް އޮތް ތަނުގައި އަވަސްވެގަންނާނެ ކަމަށް ވެސް ނަޝީދު ވިދާޅުވި އެވެ.

އެމަނިކުފާނު ވިދާޅުވީ އެކުގައި، އެއް ހިޔާލެއްގައި ތިބެ ކުރިއަށް އޮތް ރިޔާސީ އިންތިހާބު އެމްޑީޕީއަށް ކާމިޔާބު ކުރެވޭނެ ކަމަށެވެ.

އެމްޑީޕީގައި އުފެދިފައިވާ ހިޔާލުތަފާތުވުންތައް އެއްގޮތް ކުރުމުގައި ޗެއާޕާސަން ފައްޔާޒް އިސްމާއީލް މަސައްކަތް ކުރައްވާނެ ކަމުގެ ޔަގީންކަން އޮތް ކަމަށް ވެސް ނަޝީދު ވިދާޅުވި އެވެ.

މީގެކުރިން ރައީސް ސޯލިހު ވަނީ ބަރުލަމާނީ ގަރާރު އަނބުރާ ގެންދަން ރައީސް ނަޝީދަށް އިލްތިމާސް ކުރައްވާފަ އެވެ.