ފީޑާތަކުގެ ލޯޑް އެއްވަރެއްގައި ހިފެހެއްޓުމަށް ބޭނުންވާ މަސައްކަތެއް ކުރުމަށްޓަކައި މާދަމާ އަރިބިއްޔާ ފްލެޓް ސަރަހައްދުން ކަރަންޓު ކަނޑާލަން ނިންމައިފި އެވެ.

ސްޓެލްކޯއިން މިރޭ ބުނީ މާދަމާ ހެނދުނު 9:00 އިން ފެށިގެން 30 މިނިޓަށް ދުނބުރި މިސްކިތް ސަރަހައްދާއި އަރަބިއްޔާ ފްލެޓް ސަރަހައްދުން ކަރަންޓް ކަނޑާލަން ނިންމާފައިވާ ކަމަށެވެ.

އެ ސަރަހައްދުގައި ކުރަންޖެހޭ މަސައްކަތް ކުރުމުގެ ތައްޔާރީތައް މިހާރު ނިމިފައިވާ ކަމަށް ވެސް އެ ކުންފުނިން ބުންޏެވެ.

ރޭ ފަތިހުން ފެށިގެން މިއަދު ހެނދުނު ގާތްގަނޑަކަށް 9:15 ހާއިރު ވަންދެން މާލޭގެ އެކި ސަރަހައްދުތަކުން ކަރަންޓު ކެނޑި އެވެ. އެ މައްސަލައާ ގުޅިގެން ސްޓެލްކޯގެ މެނޭޖިން ޑިރެެކްޓަރު އަހުމަދު ޝަރީފު ނޫސްވެރިންނާ ވާހަކަދައްކަވަމުން ވިދާޅުވީ، ކަރަންޓު ކެނޑެން މެދުވެރިވީ، ކޭބަލަކަށް ލިބިފައިވާ ގެއްލުމަކާ ގުޅިގެން ކަމަށެވެ. އަދި އެ މައްސަލަ ދިމާވީ 8 އެ ކުންފުނިން ކަރަންޓުގެ ހިދުމަތްދޭ 16 ފީޑަރުގެ ތެރެއިން 8 ވަނަ ފީޑަރަށް ކަމަށް ވެސް އޭނާ ވިދާޅުވި އެވެ.

"މުޅި ޖުމްލަ 16 ފީޑާ މިތަނުގެ ދެ ޕަވަ ހައުސް އިން ނިކުންނާނެ. ވަޓްސިލާ ޕަވާ ހައުސް އިން ހަތް ފީޑަރު ނިކުމޭ. އެ ހަތް ފީޑަރުގެ ތެރެއިން އެއް ފީޑަރަކީ އަށް ވަނަ ފީޑަރު. އެ ފީޑަރަށް ދިމާވި މައްސަލައަކާއި ގުޅިގެން ކަރަންޓު ދިޔައީ،" އެ މައްސަލަ ދިމާވި ގޮތް ކިޔައިދެއްވަމުން ޝަރީފް ވިދާޅުވި އެވެ.