ހިޔާ ފްލެޓްގެ ފިނިޝިންގެ މަސައްކަތްތައް ނިންމުމަށް ދީފައިވާ މުއްދަތު މިމަހުގެ ނިޔަލަށް ހަމަވާތީ، އިތުރުކުރުމަށް ސަރުކަރާއެކު މަޝްވަރާ ކުރަމުންދާ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން ބުނެފި އެވެ.

އެ ކުންފުނީގެ މީޑިއާ އޮފިޝަލަކު "ހުރިހާ"އާ ވާހަކަދައްކަވަމުން މިއަދު ވިދާޅުވީ ހިޔާ ފްލެޓް ނިންމަން ދިން މުއްދަތު އިތުރުކުރަން މަޝްވަރާކުރި ނަމަވެސް ވަކި ތާރީހެއް އަދި ނުނިމޭ ކަމަށެވެ.

"އެ މަޝްވަރާތައް ކުރިޔަށް އެބަދޭ. މަޖިލީހުގެ ކޮމިޓީގައި ވެސް މިކޮޅުން ބުނެފައި އޮންނާނެ ޑިސެމްބަރާ ހަމަޔަށް ތަން ނިމޭ ވަރަކަށް ބަލާފައި މުއްދަތު އިތުރުކޮށްދޭނެ ކަމަށް،" އޭނާ ވިދާޅުވި އެވެ.

އެ އޮފިޝަލް ވިދާޅުވީ މިދިޔަ ހަފުތާގެ ނިޔަލަށް 1،000 ފްލެޓްގައި މީހުން ބަދަލުވެފައިވާ ކަމަށެވެ. އަދި އެއީ ލަފާކުރި ވަރަށް ވުރެ މަދު އަދަދެއް ކަމަށް ވެސް އޭނާ ވިދާޅުވި އެވެ.

"ތަފާތު އެކި ސަބަބުތަކާ ހުރެ އަދިވެސް ވަރަށް ގިނަ މީހުންނަށް ބަދަލުނުވެވޭ. އެހެންވީމަ މި މަޝްވަރާތައް ނިމުމުން އެނގޭނީ އިތުރަށް ދޭނީ ކިހާ މުއްދަތެއް ކަން،" އެ އޮފިޝަލް ވިދާޅުވި އެވެ.

ހިޔާ ފްލެޓްތަކުގެ ފިނިޝިން ނިންމުމަށްޓަކައި ދީފައިވާ މުއްދަތު މިމަހުގެ ނިޔަލަށް ހަމަވާނެ އެވެ.

ހިޔާ ފްލެޓްތަކުގެ ފިނިޝިންގެ މަސައްކަތް ނިންމައި، ކުލި ނެގުމަށް ކުރިން ހަމަޖެއްސީ އޮކްޓޯބަރު މަހުން ފެށިގެންނެވެ. ނަމަވެސް އެ މުއްދަތަށް ވެސް ފިނިޝިންގެ މަސައްކަތް ނުނިމުމުން މިއަހަރުގެ ނިޔަލަށް ހިޔާ ފްލެޓްތަކުގެ ފިނިޝިންގެ މަސައްކަތް ނިންމުމަށް ރައީސުލްޖުމްހޫރިއްޔާ ވަނީ އިތުރު މުއްދަތެއް ދެއްވާފަ އެވެ.

ކުރީ ސަރުކާރުން ހުޅުމާލޭގެ ދެވަނަ ފިޔަވަހީގައި އިމާރާތްކުރި ހިޔާ ފްލެޓްތައް ސަރުކާރު ބަދަލުވުމުން މި ސަރުކާރުން ހަވާލުކުރަން ނިންމީ ފިނިޝިން މަސައްކަތް ނުނިންމަ އެވެ. އޭގެ ސަބަބުން އެއްފަހަރާ ގިނަ ބަޔަކު ފްލެޓްތަކަށް ބަދަލުވުމުން ބޭނުންވާ ސާމާނު ލިބުމަށް ވެސް ދަތިތަކެއް ވަނީ ކުރިމަތިވެފަ އެވެ. އަދި ކޮވިޑް-19އާއެކު ކުރިމަތި ހަލާތާ ގުޅިގެން ބައެއް އާމްދަނީ ލިބުން ހުއްޓި ބައެއް މީހުންނަށް ފްލެޓް ނިންމަން ފައިސާ ލިބޭނެ ގޮތެއް ވެސް ނުވި އެވެ.

ހިޔާ މަޝްރޫއުގެ ދަށުން 7،000 ހައުސިން ޔުނިޓްގެ މަސައްކަތް ފެށި ނަމަވެސް އާ ސަރުކާރު ހަވާލުވެ، ވިޔަފާރި ބޭނުންތަކަށް ޓަވަރުތަކުން ގްރައުންޑުގެ ފްލެޓްތައް ތަޅާލުމަށްފަހު ޔުނިޓްތަކުގެ އަދަދު ފަހުން ވަނީ 6،720 ދަށްކޮށްފަ އެވެ. ކުރީ ސަރުކާރުން 5،500ރ. މަހު ކުލީގެ ގޮތުގައި ނަގަން ނިންމި ނަމަވެސް މި ސަރުކާރު ވަނީ މެއިންޓަނަންސް ފީގެ ގޮތުގައި 1،000 ރުފިޔާއާއެކު ކުލީގެ ގޮތުގައި 8،500 ރުފިޔާ ނަގަން ވަނީ ނިންމައިފަ އެވެ.