ހދ. ކުޅުދުއްފުށިން ތެލެސީމިއާ ޑީއެންއޭ ޓެސްޓުގެ ހިދުމަތް މިއަދު ފަށައިފި އެވެ.

ކުޅުދުއްފުށި ރީޖަނަލް ހޮސްޕިޓަލާއި ސޮސައިޓީ ފޯ ހެލްތު އެޑިއުކޭޝަން (ޝީ) ގުޅިގެން އެ ރަށުގައި މި ހިދުމަތް ދޭން ފަށާފައިވާއިރު، ކުޅުދުއްފުށި ހޮސްޕިޓަލުން ބުނީ މި ހިދުމަތުގެ ދަށުން ނަގާ ސާމްޕަލްތައް މާލެ ފޮނުވުމުގެ އިންތިޒާމް މިހާރު ހަމަޖައްސާފައި ކަމަށެވެ. އަދި މި ހިދުމަތް ބޭނުންވާ މީހުން، އެ ހޮސްޕިޓަލުގެ ވެބްސައިޓު މެދުވެރިކޮށް އެޕޮއިންޓްމަންޓް ނެގޭނެ ކަމަށް ވެސް ކުޅުދުއްފުށީ ހޮސްޕިޓަލުން ވަނީ ބުނެފަ އެވެ.

މިކަމާ ބެހޭ ގޮތުން ކުޅުދުއްފުށި ހޮސްޕިޓަލުގެ މެނޭޖަރު އަހުމަދު ދާއޫދު ވިދާޅުވީ މި ހިދުމަތް ގާއިމުކުރަން ގިނަ ދުވަސްތަކެއް ވަންދެން މަސައްކަތްކުރި ކަމަށާއި، މިއީ ވަރަށް ދިގު އިންތިޒާރެއްގެ ނިމުން ކަމަށެވެ.

އޭގެ އިތުރުން ގިނަ ގޮންޖެހުންތަކަކާއެކު މި މަސައްކަތް ކުރިއަށް ގެންދަން މަސައްކަތްކުރި ކަން ފާހަގަކޮށް އެ ހޮސްޕިޓަލުން ބުނީ އެ ސިޓީގައި ގާއިމުވި މި ހިދުމަތާއި އެކު ތެލެސީމިއާ ޑީއެންއޭ ނަގަން ކުރަންޖެހޭ ދަތުރުތަކުގެ ހަރަދުތަކަށް ކޮންމެވެސް ވަރެއްގެ ލުޔެއް ލިބިގެންދާނެ ކަމަށެވެ.

ރާއްޖޭގައި ތެލަސީމިޔާ ޑީއެންއޭ ޓެސްޓް ހެދުމަށް ކުރާ ދަތުރަކަށް ބޮޑެތި ހަރަދުތައް ކުރަންޖެހެ އެވެ. އެގޮތުން ޑީއެންއޭ ޓެސްޓު ހެދުމަށް އާއިލާތަކުން ކުރާ ދަތުރަކަށް މަދުވެގެން ވެސް 10،000 ރުފިޔާ ހަރަދުވެ އެވެ.