ކުރީގެ ޑިފެންސް މިނިސްޓަރު އަދި މާލޭގެ މޭޔަރު ކަމަށް ޕީއެންސީގެ ޓިކެޓްގައި ވާދަކުރައްވާ މޫސާ އަލީ ޖަލީލްގެ ބޭންކު އެކައުންޓަށް އެމްއެމްޕީއާރްސީގެ ފައިސާ ޖަމާވިޔަސް ދައުވާ ނުކުރަން ޕީޖީ އޮފީހުން ނިންމާފައިވާކަން އެނގިއްޖެ އެވެ.

"ހުރިހާ"އަށް އެނގިފައިވާ ގޮތުގައި އެ މައްސަލާގައި ދައުވާ ނުކުރަން ޕީޖީ އޮފީހުން ވަނީ ކުރިން ނިންމާފަ އެވެ.

އެމްއެމްޕީއާރްސީގެ މައްސަލަ ތަހުގީގު ކުރުމަށްފަހު އެންޓި ކޮރަޕްޝަން ކޮމިޝަނުން ނެރުނު ރިޕޯޓްގައި ވެސް މޫސާ އަލީ ޖަލީލްގެ އެކައުންޓަށް އެމްއެމްޕީއާރްސީގެ ފައިސާ ޖަމާވިކަމަށް ފާހަގަކޮށްފައިވެ އެވެ.

މޫސާ އަލީ ޖަލީލްއަށް އެމްއެމްޕީއާރުސީގެ ފައިސާއިން އެއް މިލިއަން ރުފިޔާ ލިބުނު ކަމަށް ރައްޔިތުންގެ މަޖިލީހުން އާންމުކުރި ލިސްޓާއި އެންޓި ކޮރަޕްޝަން ކޮމިޝަނުގެ ރިޕޯޓްގައިވެ އެވެ.

އެ ރިޕޯޓްގައި ވަނީ އެމްއެމްޕީއާރުސީން މޫސާ އަލީ ޖަލީލަށް ލިބުނު ފައިސާއަކީ ކުށް ކޮށްގެން ހޯދާފައިވާ ފައިސާކަން ތަހުގީގަށް ހޯދިފައިވާ ކަމަށެވެ. އަދި، އެއީ ކުށް ކޮށްގެން ހޯދާފައިވާ ފައިސާކަން ޖަލީލަށް އެނގޭނެކަމަށް ބެލެވޭނެ މިންވަރަށް އެކަށީގެންވާ ސަބަބުތައް ވެސް ހުރިކަމަށް އެ ރިޕޯޓްގައިވެ އެވެ.

މޫސާ އަލީ ޖަލީލަށް އެމްއެމްޕީއާރްސީގެ ފައިސާ ލިބިފައިވާ މައްސަލައާ ގުޅިގެން އިއްޔެ ނޫސްވެރިއަކު ސުވާލުކުރުމުން ރައީސް މުހައްމަދު މުއިއްޒު ވަނީ އިތުރުފުޅު ހައްދަވާފަ އެވެ. ރައީސް މުއިއްޒު ވިދާޅުވީ އޭނާއަށް އެ ފައިސާ ނުލިބޭ ކަމަށެވެ. އެކަމަކު އެންޓި ކޮރަޕްޝަން ކޮމިޝަނުން ނެރުނު ތަހުގީގީ ރިޕޯޓުން އެކަން ކަށަވަރުވެ އެވެ.