4،300 ޑޮލަރާއެކު ޖެނުއަރީ މަހު އެންމެ ގިނައިން ސާވިސް ޗާޖް ދިން ރިސޯޓަކަށް ވެލާ

ސާވިސް ޗާޖުގެ ގޮތުގައި 4،300 އަށް ވުރެ ގިނަ ޑޮލަރާއެކު ފާއިތުވި މަހެއްހާ ދުވަހުގެ ތެރޭގައި އެންމެ ގިނައިން ސާވިސް ޗާޖް ދިން ރިސޯޓަކަށް ވެލާ ޕްރައިވެޓް އައިލެންޑް ވެއްޖެ އެވެ.

ނ. އަތޮޅުގައި ހިންގާ އެންމެ މަތީ ފެންވަރުގެ އެ ރިސޯޓަކީ ކޮންމެ މަހަކު ވެސް އެންމެ މަތިން ސާވިސް ޗާޖު ބަހަމުން އަންނަ އެއް ރިސޯޓެވެ.

މިފަހަރު ހައި ސީޒަންގެ 20 ޑިސެމްބަރުން 20 ޖެނުއަރީއާ ހަމައަށް ސާވިސް ޗާޖުގެ ގޮތުގައި ވެލާއިން ވަނީ ކޮންމެ މުވައްޒަފަކަށް 4،317 ޑޮލަރު ދީފަ އެވެ. އެއީ ދިވެހި ރުފިޔާއިން ބަލާއިރު 66،568.14 ރ. އެވެ. އެއީ ރާއްޖޭގައި ހިންގާ އެންމެ އަގުބޮޑު އެއް ރިސޯޓެވެ.

މި ޖެނުއަރީ މަހު ދެވަނައަށް އެންމެ ގިނައިން ސާވިސް ޗާޖު ދިނީ ވޮލްޑޯފް އެސްޓޯރިއާ އިންނެވެ. އެއީ 4،117 ޑޮލަރެވެ. މިފަހަރު 4،000 ޑޮލަރުން މަތި ސާވިސް ޗާޖު ބަހާފައި ވަނީ އެ ދެ ރިސޯޓުން އެކަންޏެވެ. މިފަހަރު ތިންވަނަ އަށް އެންމެ ގިނައިން ސާވިސް ޗާޖު ބަހާފައި ވަނީ ރިޓްޒް ކާލްޓަން ފަރި އައިލެންޑް ރިސޯޓުންނެވެ. އެ ރިސޯޓުން ބަހާފައި ވަނީ ކޮންމެ މުވައްޒަފަކަށް 3،988 ޑޮލަރު އެވެ.

އެންމެ މަތިން ސާވިސް ޗާޖު ދިން 10 ރިސޯޓު:

1- ވެލާ - 4317 ޑޮލަރު

2- ވޮލްޑޯފް އެސްޓޯރިއާ - 4117 ޑޮލަރު

3- ރިޓްޒް ކާލްޓަން ފަރި އައިލެންޑް - 3988 ޑޮލަރު

4- ޝެވަލް ބްލޯންކް ރަންދެލި - 3655 ޑޮލަރު

5- ފޯ ސީޒަންސް - 3037 ޑޮލަރު

6- ޖޯލި މޯލްޑިވްސް - 2650 ޑޮލަރު

7- ވަން އެންޑް އޮންލީ ރީތި ރަށް - 2400 ޑޮލަރު

8- ޖޯލި ބީން - 2،252 ޑޮލަރު

9-ސޮނޭވާ ފުށި - 2،199 ޑޮލަރު

10- ޕާކް ހަޔަޓް - 2،026 ޑޮލަރު

މިދިޔަ އަހަރުގެ ޖެނުއަރީ މަހު އެންމެ ގިނައިން ސާވިސް ޗާޖު ދިނީ ރިޓްޒް ކާލްޓަންއިންނެވެ. އެއީ 4،409 ޑޮލަރެވެ.

ރާއްޖޭގެ ހުރިހާ ޓޫރިސްޓް ފެސިލިޓީއަކުން ސާވިސް ޗާޖުގެ ގޮތުގައި 10 ޕަސެންޓު ނެގުން މިހާރު ވަނީ ގާނޫނީ ގޮތުން މަޖުބޫރުކޮށްފަ އެވެ. ސާވިސް ޗާޖު ނުދީފި ނަމަ ވަޒީފާ ދޭ ފަރާތް ބައި ލައްކަ ރުފިޔާއަށް ވުރެ ބޮޑު ނޫން އަދަދަކުން ޖޫރިމަނާ ކުރުމުގެ ބާރު، ލޭބާ ރިލޭޝަންސް އޮތޯރިޓީ (އެލްއާރުއޭ) އަށް އޮވެ އެވެ.