މިއަހަރުގެ ޖުލައި 1 ފެށިގެން ސަސްޕެންޑް ކޮށްފައިވާ ތައިލެންޑްގެ ބޮޑުވަޒީރު ޕެޓޮންގްޓާން ޝިނަވަތުރާ މަގާމުން ވަކިކޮށްފި އެވެ.

ބޮޑުވަޒީރު މަގާމުން ވަކިކުރީ އެގައުމުގެ ދުސްތޫރީ ކޯޓުންނެވެ.

އުމުރުން 39 އަހަރުގެ ބޮޑުވަޒީރު ޕެޓޮންގްޓާން ޝިނަވަތުރާ މަގާމުން ވަކިކޮށްފައި މިވަނީ ކެމްބޯޑިއާ އާއި ތައިލެންޑްގެ ހަމަނުޖެހުމުގެ ތެރެއިން ސުލޫކީ ހަމަތަކާއި ހިލާފަށް އަމަލު ކުރެއްވި ކަމަށްބުނެ ޖުލައި 1 ވަނަ ދުވަހުން ފެށިގެން ސަސްޕެންޑް ކޮށްފައި ބެހެއްޓުމަށް ފަހުގަ އެވެ.

މައްސަލަ ހޫނުވީ ބޮޑުވަޒީރު ޕެޓޮންގްޓާން ޝިނަވަތުރާ ކެމްބޯޑިއާގެ ސިޔާސީ އިސް ބޭފުޅެއް ކަމަށްވާ ހުން ސެން އަށް ފޯނުން ގުޅުއްވައި ދެއްކެވި ވާހަކަތަކެއްގެ އޯޑިއޯ ލީކުވުމާ ގުޅިގެންނެވެ. އެ ކޯލްގައި އޭނާއަށް ތައިލެންޑުގެ ބޮޑުވަޒީރު މުހާތަބުކުރައްވަނީ "އަންކަލް" ގެ ގޮތުގަ އެވެ. އެ ކޯލްގައި ތައިލެންޑުގެ އަސްކަރީ ކޮމާންޑަރުންނަކީ އިދިކޮޅު މީހުން ކަމަށް ވެސް ޕެޓޮންގްޓާން ވިދާޅުވެ އެވެ.

އަދި ފޯން ކޯލުގައި އެ މައްސަލަ ހައްލު ކޮށްދިނުމަށް ހުން ސެން އަރިހުން އެދުމާއެކު، އޭގެ ބަދަލުގައި އޭނާ ބުނި ކޮންމެ ކަމެއް ކުރައްވާނެކަމަށް ޕެޓޮންގްޓާން ވައުދުވެ ވަޑައިގަންނަވަ އެވެ. ޕެޓޮންގްޓާން ވަނީ ފޯން ކޯލް ލީކްވުމާއި ގުޅިގެން މާފަށް އެދިވަޑައިގެންފައިވެ އެވެ.

ޕެޓޮންގްޓާން ބޮޑުވަޒީރު ކަމަށް އިންތިހާބުވިތާ އަދިވީ އެއް އަހަރު ދުވަހެވެ. މީ ޝިނަވަތުރާ އާއިލާގެ ބޮޑު ވަޒީރު ކަމުގެ މަގާމުން ވަކި ކުރި ތިންވަނަ ބޮޑު ވަޒީރެވެ. ޕެޓޮންގްޓާންގެ ބައްޕާފުޅު އަދި ކުރީގެ އެ ގައުމުގެ ބޮޑުވަޒީރު ތަކްސިން ޝިނަވަތުރާ 2006 ވަނަ އަހަރު އަސްކަރީ އިންގިލާބަކުން މަގާމުން ދުރުކުރި އެވެ. އޭގެ ފަހުން ޕެޓޮންގްޓާން ގެ ބޮޑުދައިތާފުޅު ޔިންގްލަކް ޝިނަވަތުރާ ވެސް 2014 ވަނަ އަހަރު މަގާމުން ވަކިކޮށްފައިވެ އެވެ.