ވައިގެ ދަތުރުފަތުރު ބެލެވިފައި އޮންނަނީ މުޅި ދުނިޔޭގައި ވެސް އެންމެ ރައްކާތެރި ދަތުރުފަތުރުގެ ގޮތުގަ އެވެ. މިއާއެކު ވެސް ކޮންމެ އަހަރަކު ވައިގެ ދަތުރުފަތުރުގެ ގިނަ ހާދިސާތަކެއް ހިނގަ އެވެ.

ވައިގެ އުދުހުންތަކުގައި އެންމެ ނުރައްކާތެރި ކަމަށް ގިނަ ބަޔަކު ގަބޫލު ކުރަނީ ވަކި އުސްމިނެއްގައި މަތިންދާ ބޯޓު އުދުހެމުން ދާ ވަގުތެވެ. ވާނީ ވެސް އެހެންނެވެ. އެ ވަގުތަކީ އިންޖީނު ފިޔަވައި އެއްވެސް ބާރެއް ނެތި ވައިގެ ތެރޭގައި ހޭދަވާ ވަގުތެކެވެ.

އެހެން ނަމަވެސް މާހިރުން ވިދާޅުވާ ގޮތުގައި ވައިގެ ދަތުރުފަތުރުގެ ގިނަ ހާދިސާތައް ކުރިމަތިވަނީ މައިގަނޑު ގޮތެއްގައި ވަކި ވަގުތެއްގަ އެވެ. އެއީ ވައިގެ ތެރޭގައި އުދުހެމުންދާ ވަގުތެއް ނޫނެވެ. އެހެން ނަމަވެސް ރަންވޭއިން ނައްޓާލާ ގަޑިއާއި ޖައްސާ ގަޑި އެވެ.

މިހާތަނަށް ހިނގާފައިވާ ވައިގެ ދަތުރުފަތުރުގެ ހާދިސާތަކުގެ ތަފާސް ހިސާބުތަކަށް ބަލާއިރު ވެސް ފެންނަން އޮތީ ހަމަ މި މަންޒަރެވެ.

މިދިޔަ އަހަރު ވައިގެ ދަތުރުފަތުރުގެ ޖުމްލަ 1468 ހާދިސާ ހިނގާފައިވާއިރު 770 ހާދިސާއަކީ ރަންވޭއިން ނައްޓާލަން އުޅުމުގެ ތެރޭގައި ކުރިމަތިވި ހާދިސާތަކެވެ. އެއާއެކު 124 ހާދިސާ ހިނގާފައި ވަނީ ޖައްސަން އުޅެނިކޮށެވެ.

މާހިރުން ވިދާޅުވާގޮތުގައި މި ދެ ވަގުތަކީ ވަރަށް ގިނަ ފްލައިޓް އޮފިޝަލުން ވަރަށް ގިނަ ކަންކަން ކުރަންޖެހޭ ވަގުތަކަށްވާއިރު އެއާޕޯޓުތަކުން އެ އޮފިޝަލުންނަށް ޕްރެޝަރު ވެސް އަންނަ ވަގުތެކެވެ.

ގިނަ ހާދިސާތައް ހިނގާފައި ހުންނަނީ މި ވަގުތު ޕައިލެޓުން ކުރަންޖެހޭ ކަމެއް އަތުން ދޫވުމުގެ ސަބަބުން ކަމަށް ވެސް އެ ބޭފުޅުން ވިދާޅުވި އެވެ. ކަން މިހެން އޮތް ނަމަވެސް ވައިގެ ދަތުރު ފަތުރަކީ ދުވަހަކަށްވުރެ ދުވަހެއް އާއްމުވަމުން އަންނަ އެންމެ ރައްކާތެރި ދަތުރު ފަތުރުގެ ނިޒާމެވެ.