ދިރާސީ އަހަރު ފެށުމަށް ދެތިން ދުވަހަށް ވީއިރުވެސް ދަރިވަރުންގެ ޓެކްސްޓް ފޮތްތައް ނުލިބުމުގެ ޝަކުވާ ބޮޑުވެފައި ވަނިކޮށް ޓެކްސްޓް ފޮތްތައް ސުކޫލުތަކަށް ފޮނުވަން ފަށައިފި އެވެ.

އަންނަ ހޯމަ ދުވަހު ސުކޫލުތައް ހުޅުވޭއިރު، މިހާރު ޓެކްސްޓް ފޮތްތައް ސްކޫލުތަކަށް ފޮނުވަން ފަށާފައިވާ ކަމަށް އެޑިއުކޭޝަން މިނިސްޓްރީން މިއަދު ވަނީ ބުނެފަ އެވެ.

ސްކޫލު ހުޅުވެން ކައިރިވެފައިވާއިރު، ދަރިވަރުންގެ ޓެކްސްޓް ފޮތްތައް ނުލިބޭ ކަމުގެ ޝަކުވާ ބެލެނިވެރިން އަންނަނީ ކުރަމުންނެވެ.

އެޑިއުކޭޝަނުން މާލެ ސަރަހައްދުގެ ސުކޫލުތަކުގެ ފޮތްތައް ދަރިވަރުންނަށް ދޫކޮށްފައި ވީނަމަވެސް ގއ. އަދި ގދ. އަތޮޅު، އައްޑޫ ސިޓީ އަދި ފުއްމުލަކަށް ފޮތްތައް ފޮނުވަން ފަށާފައިވަނީ މި ހަފްތާގަ އެވެ.

އެޑިއުކޭޝަނުން ވަނީ ސްކޫލު ހުޅުވުމުގެ ކުރިން ހުރިހާ ދަރިވަރުންނަށް ފޮތްތައް ހަމަވާނެ ކަމުގެ ޔަގީންކަން ދީފަ އެވެ.

މި އަހަރު ފޮތްތައް ފޮނުވާނީ ކޮންމެ ދަރިވަރެއްގެ ފޮތްބައި ހަމަކޮށްފައި ކަމަށް އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު ވަނީ ވިދާޅުވެފަ އެވެ.