މިފަހުން ހޮލީވުޑްގެ ހަބަރުތަކުގައި އެންމެ ބޮޑަށް ދެކެވުނު އެއް ވާހަކައަކީ ހެއިލީ ބީބާ އޭނާގެ ފިރިމީހާ ޖަސްޓިން ބީބާގެ އިންސްޓަގްރާމް އެކައުންޓް އަންފޮލޯކުރި ވާހަކަ އެވެ.

ޕީޕަލްސް މެގަޒިންއިން އާއްމުކުރި ޓިކްޓޮކް ވީޑިއޯއެއްގައި ހެއިލީ އިންސްޓަގްރާމުން ފޮލޯކުރާ މީހުންގެ ލިސްޓެއް ފެންނައިރު އެ ލިސްޓުގައި ޖަސްޓިންގެ އެކައުންޓްއެއް ނެތެވެ.

މިއާއެކު އެ ދެމަފިރިންގެ ކައިވެނީގައި ކުނިޖެހި ވަރިވާން އުޅޭކަމަށް ދެކެވޭ ވާހަކަތައް އިތުރަށް ގަދަވި އެވެ. އެގޮތުން ހެއިލީ ޖަސްޓިން އަންފޮލޯކުރީ އެ ދެމީހުންގެ މެދުގައި ޖެހުނު މައްސަލައެއްގެ ސަބަބުން ކަމަށް ހަބަރުތައް ބުންޏެވެ.

އެހެން ނަމަވެސް އެ ވީޑިއޯ އާއްމުކުރިތާ މާގިނައިރެއް ނުވެ ހެއިލީ ވަނީ އެއީ ޓެކްނިކަލް މައްސަލައެއް ކަމަށް ބުނެ އެ ވީޑިއޯއަށް ކޮމެންޓް ކޮށްފަ އެވެ.

"އެއީ ’ގްލިޗް’ އެއް. އަހަރެން އޭނާ އަންފޮލޯއެއް ނުކުރަން. ހީކުރަން އެކަން ސާފުވާނެ ކަމަށް" ކޮމެންޓްގައި ހެއިލީ ބުނެފައިވެ އެވެ.

މިކަން ފާހަގަވެފައިވަނީ ޖަސްޓިން އޭނާގެ އިންސްޓަގްރާމްގައި ގިނަ ޕޯސްޓް ތަކެއް ހިއްސާކުރި ދުވަހެއްގަ އެވެ. އެ ދުވަހު ކުޑަ ވަގުތުކޮޅަކަށް އޭނާގެ އެކައުންޓް ޑީއެކްޓިވޭޓް ވެސް ކުރި އެވެ.

ޖަސްޓިންއާއި ހެއިލީގެ ކައިވެނި ރޫޅެން އުޅޭ ކަމަށް އަޑު ފެތުރިފައި ވީނަމަވެސް އެ ދެމީހުން އެކުގައި ދޭތެރެ ދޭތެރެއިން ފެންނަމުންދެ އެވެ.