އެމެރިކާގެ ރައީސް ޑޮނަލްޑް ޓްރަންޕްގެ ސޯޝަލް މީޑިއާ އެކައުންޓުތައް ސަސްޕެންޑް ކުރުމާއި ގުޅިގެން 2021 ވަނަ އަހަރު ފޭސްބުކް ހިންގާ "މެޓާ" ކުންފުންޏާ ދެކޮޅަށް ހުށަހެޅި މައްސަލައިގައި އެ ކުންފުނިން 25 މިލިއަން ޑޮލަރު ދައްކަން އެއްބަސްވެއްޖެ އެވެ.

2021 ވަނަ އަހަރުގެ ޖެނުއަރީ 6 ވަނަ ދުވަހު އެމެރިކާގެ ވޮޝިންގްޓަން ޑީ.ސީ ގައި ހުންނަ ޤައުމީ މަޖިލީހުގެ އިމާރާތަށް ދިން ހަމަލާއާ ގުޅިގެން އެ ކުންފުނިން ރައީސް ޓްރަމްޕްގެ އެކައުންޓްތައް ސަސްޕެންޑް ކުރުމާ ގުޅިގެން ޓްރަމްޕް ވަނީ ފޭސްބުކް، އިންސްޓަގްރާމް، ވަޓްސްއެޕް އަދި ތްރެޑްސްވެސް ހިންގާ މެޓާ ޕްލެޓްފޯމްސް (މެޓާ.އޯ) ދައުވާކޮށްފަ އެވެ.

މީގެ އިތުރުން ޓްރަމްޕް ވަނީ މި މައްސަލައިގައި 2021 ވަނަ އަހަރުގެ ޖުލައި މަހު ޓްވިޓާ އިންކް (މިހާރު އެކްސް) ފޭސްބުކް އިންކް އަދި އަލްފަބެޓް އިންކްގެ (ގޫގުލް.އޯ) ގޫގުލްގެ އިތުރުން އެ ކުންފުނިތަކުގެ ސީއީއޯއިންގެ މައްޗަށް ދައުވާ ކޮށްފަ އެވެ. މި ދައުވާގައި ބުނެފައިވަނީ އެ ކުންފުނިތަކުން ޤާނޫނާ ހިލާފަށް ކޮންޒަވޭޓިވް ވިސްނުންތަކުގެ އަޑު ކަނޑުވާލަން މަސައްކަތް ކޮށްފައިވާ ކަމަށެވެ.

ޓްރަމްޕްގެ ފޭސްބުކް އަދި އިންސްޓަގްރާމް އެކައުންޓްތައް ސަސްޕެންޑް ކުރެވުނީ އެމަނިކުފާނަށް ތާއީދުކުރާ ފަރާތްތަކުން ކެޕިޓޯލްއަށް ހަމަލާ ދިނުމާއި ގުޅިގެންނެވެ. މި ހަމަލާ ދިނީ 2020 ވަނަ އަހަރު ބޭއްވި ރިޔާސީ އިންތިހާބުގައި ޓްރަމްޕް ބަލިވެފައިވަނީ ވޯޓު އޮޅުވާލުމުގެ ސަބަބުން ކަމަށް ވިދާޅުވެ ދެއްކެވި ދޮގު ވާހަކަތަކާއި ގުޅިގެންނެވެ.

މެޓާއިން އެއްބަސްވެފައިވާ އަދަދުގެ ތެރެއިން 22 މިލިއަން ޑޮލަރު ދާނީ ޓްރަމްޕްގެ ރިޔާސީ ލައިބްރަރީއަށް ކަނޑައެޅިފައިވާ ފަންޑަކަށެވެ. އަދި ބާކީ އަދަދު ދާނީ ޤާނޫނީ ފީތަކަށާއި މި މައްސަލާގައި ހިމެނޭ އެހެނިހެން ދައުވާކުރާ ފަރާތްތަކަށެވެ.

ފޭސްބުކްގެ މައި ކުންފުނި ކަމުގައިވާ މެޓާއިން މި މައްސަލަ ހައްލުކުރުމާ ގުޅޭ ނޯޓިސްއެއް ސަން ފްރެންސިސްކޯގެ ފެޑެރަލް ކޯޓަކަށް ވަނީ ހުށަހަޅާފަ އެވެ.

މި ދައުވާއާ ގުޅޭ މަޝްވަރާތަކަށް 2023 ވަނަ އަހަރުގެ ފަހުކޮޅުން ފެށިގެން މާ ބޮޑު ކުރިއެރުމެއް ނުލިބި ހުއްޓިފައި އޮތް ނަމަވެސް، ނޮވެމްބަރު މަހު މެޓާގެ ސީއީއޯ މާކް ޒަކަބާގް ފްލޮރިޑާގައި ހުންނަ ޓްރަމްޕްގެ ކްލަބަށް ޒިޔާރަތްކޮށް ޓްރަމްޕާއެކު ފަރިއްކޮޅެއްގައި ބައިވެރިވުމަށްފަހު، މި މައްސަލައާ ގުޅޭ މަޝްވަރާތައް އަލުން ފެށުނެވެ.

ޒަކަބާގް ރައީސް ޓްރަމްޕާއި ގުޅުން ބަދަހި ކުރަން ނިންމިއިރު، ޓްރަމްޕް ވަނީ މީގެ ކުރިން ޒަކަބާގް ޖަލަށް ލާނެކަމަށްވެސް އިންޒާރު ދެއްވާފަ އެވެ.

މިއާއެކު މެޓާއިން ވަނީ ޑިސެންބަރު މަހު ޓްރަމްޕްގެ އިނޯގްރަލް ފަންޑަށް 1 މިލިއަން ޑޮލަރުގެ އެހީއެއް ދީފަ އެވެ.

މެޓާއިން ވަނީ ޖެނުއަރީ މަހު އެ ކުންފުނީގެ ޑައިވަރސިޓީ، އިކުއިޓީ އަދި އިންކްލޫޝަން (ޑީއީއައި) ޕްރޮގްރާމްތައް ނިމުމަކަށް ގެނެސްފަ އެވެ. އަދި މީގެ އިތުރުން އެމެރިކާގެ ފެކްޓް-ޗެކިންގ ޕްރޮގްރާމް ހުއްޓާލައި، އިމިގްރޭޝަނާއި ޖިންސީ ކަންކަމާ ގުޅޭ ބަހުސްތަކުގެ މައްޗަށް އޮންނަ ހަނިކުރުންތައް ލުއިކޮށްފައިވެ އެވެ.

މެޓާއިން ވަނީ ރިޕަބްލިކަން ޕާޓީގެ ފާހަގަކޮށްލެވޭ މެންބަރެއް ކަމަށްވާ ޖޮއެލް ކެޕްލަން އެ ކުންފުނީގެ ޗީފް ގްލޯބަލް އެފެއާޒް އޮފިސަރުގެ މަޤާމަށް އައްޔަންކޮށްފަ އެވެ. އަދި މީގެ އިތުރުން އަލްޓިމެޓް ފައިޓިންގ ޗެމްޕިއަންޝިޕް (ޔޫއެފްސީ) ގެ ސީއީއޯ އަދި ޓްރަމްޕްގެ ގާތް ރަހުމަތްތެރިއެއް ކަމަށްވާ ޑާނާ ވައިޓް އެ ކުންފުނީގެ ބޯޑަށް އިންތިޚާބުކޮށްފަ އެވެ.