މަޝްހޫރު ޕޮޕް ބޭންޑް "ވަން ޑިރެކްޝަން"ގެ ކުރީގެ މެމްބަރު ލިއަމް ޕޭންއަށްޓަކައި އެ ބޭންޑުގެ ދެން ތިބި މެމްބަރުން 8 އަހަރަށްފަހު އެކުގައި ސްޓޭޖަކުން ފެނިދާނެ ކަމަށް ހަބަރުތައް ބުނެފި އެވެ.

މިދިޔަ އަހަރުގެ އޮކްޓޯބަރު މަހު ކުއްލި ގޮތަކަށް މަރުވި ލިއަމްއަށް އަންނަ މާޗު މަހު ބާއްވާ ބްރިޓް އެވޯޑުގައި ހާއްސަ ޓްރިބިއުޓެއް ދޭން ވަނީ ނިންމާފަ އެވެ.

އެކުގައި މަސައްކަތްކުރި ލިއަމްއަށް ދޭ ހާއްސަ ޓްރިބިއުޓްގައި ހިއްސާ ވުމަށް ވަން ޑިރެކްޝަންގެ އެހެން މެމްބަރުން ތިބީ ތައްޔާރަށް ކަމަށް ބުނެވެ އެވެ. އެގޮތުން އެ އެވޯޑުގައި ހެރީ ސްޓައިލްސް، ޒެއިން މަލިކް، ލުއިސް ތޮމްލިންސަން އަދި ނިއަލް ހޯރަން ފެންނާނެ ކަމަށް ލަފާކުރެވެ އެވެ.

މިއީ 2010 ވަނަ އަހަރު އުފެދުނު ވަން ޑިރެކްޝަން އޭގެ ހަ އަހަރު ފަހުން ރޫޅުމަށްފަހު އެކުގައި ސްޓޭޖެއްގެ މަތިން ފެނިގެންދާނެ ފުރަތަމަ ފަހަރެވެ.

ބްރިޓް އެވޯޑްސް އިންތިޒާމްކުރާ ފަރާތުން ބުނެފައިވަނީ އެ އެވޯޑަށް ލޯބިކުރި ލިއަމްއަށް ހާއްސަ ޓްރިބިއުޓެއް ދޭން އޭނާގެ ބޭންޑް މެމްބަރުން އެއްތަން ކުރަން މަސައްކަތް ކުރަމުން އަންނަ ކަމަށެވެ.

2010ގެ އަހަރުތަކުގައި އެންމެ މަގުބޫލުވި އެއް ބޭންޑް ކަމަށްވާ ވަން ޑިރެކްޝަން ވަނީ އެ ބޭންޑް ހަރަކާތްތެރިވި ހަ އަހަރު ތެރޭގައި ހަތް މިލިއަން ރެކޯޑްސް ވިއްކާފަ އެވެ.

މިދިޔަ އޮކްޓޯބަރު މަހު ލިއަމް މަރުވީ އާޖެންޓީނާ ބުއެނޯސް އެއިރެސްގައި އޭނާ ހުރި ހޮޓަލުގެ ބެލްކަނިން ވެއްޓިގެންނެވެ. ތުހުމަތު ކުރެވޭ ގޮތުގައި ވެއްޓުނުއިރު އޭނާ ހުރީ މަސްތުގެ ހާލަތުގަ އެވެ.