ބުރުސޫރަ ރީތި ކުރުމުގެ ގޮތުން ޕްލާސްޓިކް ސާޖަރީ ހެދުމަކީ މާބޮޑު މައްސަލައެއްގެ ގޮތުގައި ނުދެކޭ ކަމަށް ބޮލީވުޑްގެ ޒުވާން ތަރި ޚުޝީ ކަޕޫރު ބުނެފި އެވެ.

ޚުޝީ މި ބީދައިން ވާހަކަ ދައްކާފައިވަނީ ދާދި ފަހުން އިންޑިއާގެ މީޑިއާއަކަށް ދިން އިންޓަވިއެއްގައި އޭނާ ހެދި ޕްލާސްޓިކް ސާޖަރީއާ ބެހޭގޮތުން ސުވާލު ކުރެވެމުންނެވެ.

2023 ވަނަ އަހަރު ޚުޝީ އޭނާގެ ނޭފަތާއި ތުންފަތް ރީތިކުރަން "ނޯސް ޖޮބް" އަދި "ލިޕް ފިލާސް" ސާޖަރީ ހެދި ކަމަށް އަޑުތައް ފެތުރުނެވެ.

ޚުޝީ ވަނީ އެ އަޑުތައް ޔަގީންކޮށްދީ އެ ސާޖަރީ ހެދި ކަމަށް ބުނެ މިދިޔަ އަހަރުގެ އޮގަސްޓް މަހު އޭނާގެ އިންސްޓަގްރާމްގައި ޕޯސްޓެއް ކޮށްފަ އެވެ.

އާއްމުކޮށް ތަރިން ފޮރުވަން އުޅޭ ކަމެއް އެހާ ފާޅުކަން ބޮޑު ގޮތެއްގައި އާއްމުކުރީ ކީއްވެގެންތޯ ސުވާލު ކުރެވުމުން ޚުޝީ ބުނީ އެއީ މާ ބޮޑު ކަމަކަށް އޭނާ ނުހަދާ ކަމަށެވެ.

ފިލްމީ މަސައްކަތްތަކަށް ބަލާއިރު ޚުޝީ ބޮލީވުޑަށް ތައާރަފްވީ ނެޓްފްލިކްސްގެ ފިލްމު "ދަ އާޗީސް"އިންނެވެ. އޭނާ އެންމެ ފަހުން ފެނުނީ އާމިރު ޚާންގެ ދަރިފުޅު ޖުނައިދު ޚާންއާއެކު "ލައްޔައްޕާ"އިންނެވެ.