ހެއްވާ މަޖާ ރޯލުތައް ކުޅުމަކީ އަބަދުވެސް އެކްޓަރުންނަށް އުނދަގޫ ކަމެކެވެ. ނަތީޖާއަކަށް ވަނީ މިފަދަ ރޯލުތައް މޮޅަށް ކުޅޭ ތަރިންނަށް ބޮޑު އާމްދަނީއެއް ލިބުމެވެ.

ދުނިޔޭގައި ފާހަގަކޮށްލެވޭ މަޝްހޫރު ކޮމެޑީ އެކްޓަރުންގެ ތެރޭގައި ޓޮމް ކްރޫޒުއާއި ޝާހްރުކް ޚާންއަކީ ފާހަގަ ކޮށްލެވޭ ތަރިން ތަކެކެވެ. އެހެން ނަމަވެސް މި ތަރިންނަކީ އެ ދާއިރާގައި އެންމެ މުއްސަނދި ތަރިންނެއް ނޫނެވެ.

ކޮމެޑީ ރޯލުތައް ކުޅޭ ތަރިންގެ ތެރެއިން އެންމެ މުއްސަނދި ތަރިއަކީ އާއްމުންނަށް އެހާ ބޮޑަށް ނޭނގޭ ހޮލީވުޑްގެ އެންމެ ދެ ފިލްމަކުން ފެނިފައިވާ ތަރި އެކެވެ. އެއީ ޖެރީ ސީންފީލްޑެވެ.

މަޝްހޫރު ސިޓްކޮމް "ސީންފީލްޑް"އިން ބޮޑު މަގުބޫލު ކަމެއް ހޯދި ޖެރީ އާއްމުކޮށް މާ ގިނައިން ސްކްރީންތަކުން ނުފެނުނު ނަމަވެސް އޭނާގެ މަދު ފެނިލުންތަކަށް ވަރަށް ބޮޑު އަގެއް ނަގަ އެވެ.

ނަތީޖާއަކަށް ވެގެން ދިޔައީ މާ ގިނަ ބަޔަކަށް އެނގުމެއް ނެތި ކުޑަ ދުވަސްކޮޅެއްގެ ތެރޭގައި ޖެރީ ބިލިއަނަރެއްގެ ލަގަބު ހޯދުމެވެ. މިއަދު ޖެރީއަކީ ދުނިޔޭގެ އެންމެ މުއްސަނދި ސްޓޭންޑް އަޕް ކޮމީޑިއަން އެވެ.

އޭނާގެ މިލްކިއްޔާތުގައި 1.1 ބިލިއަން އެމެރިކާ ޑޮލަރު ހުރިކަމަށް ރިޕޯޓުތައް ބުނާއިރު މިއީ ހޮލީވުޑްގައި މަޝްހޫރުކަން ހޯދާފައިވާ ތަރިންގެ މިލްކިއްޔާތަށްވުރެ ވެސް ބޮޑު އަދަދެކެވެ.

މި ބޮޑު އާމްދަނީއާއެކު ޖެރީ ދިރިއުޅެމުން އަންނަނީ ވަރަށް ފުދުންތެރި ދިރިއުޅުމެއް ކަމަށާއި އޭނާގެ މިލްކިއްޔާތުގައި އަގުބޮޑު ގެތަކާއި ކާރުތައް ހިމެނޭ ކަމަށް ވެސް ރިޕޯޓުތައް ބުނެ އެވެ.