އިސްރާއީލާއި ލުބުނާނުގެ ހިޒްބުއްލާއާ ދެމެދު ހަނގުރާމަ ހުއްޓާލުމުގެ އެއްބަސްވުމެއް 27 ނޮވެމްބަރުން ފެށިގެން އަމަލުކުރަން ފަށާފައިވާ ކަމަށް އެމެރިކާއިން ބުނެފި އެވެ.

އެމެރިކާގެ ރައީސް ޖޯ ބައިޑެން ވިދާޅުވި ގޮތުގައި މި އެއްބަސްވުމަކީ އެމެރިކާއާއި ފްރާންސް މެދުވެރިވެގެން ދެފަރާތުން ޤަބޫލުކުރި އެއްބަސްވުމެއް ކަމަށެވެ.

2023 ވަނަ އަހަރު އިޒްރޭލާއި ގާޒާގެ ހަނގުރާމައިގެ ސަބަބުން ފެށުނު މި ހަނގުރާމައިގައި އެތައް ބަޔަކު މަރުވެފައިވާއިރު، މި އެއްބަސްވުމަކީ މި ހަނގުރާމަ ދާއިމީކޮށް ނިމުމަކަށް ގެނައުމަށް ފަރުމާކުރެވިފައިވާ އެއްބަސްވުމެއްކަމަށް ބައިޑެން ވިދާޅުވި އެވެ.

އިޒްރޭލު ސެކިއުރިޓީ ކެބިނެޓުން 10-1 އަށް މި އެއްބަސްވުން ފާސްކުރުމަށްފަހު ވައިޓް ހައުސްގައި ވާހަކަފުޅު ދައްކަވަމުން ބައިޑެން ވިދާޅުވީ އޭނާ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއާއި ލުބުނާނުގެ ބޮޑުވަޒީރު ނަޖީބް މިކާތީއާ ވާހަކަދައްކަވާފައިވާ ކަމަށެވެ.

ބައިޑެން ވިދާޅުވި ގޮތުގައި އިޒްރޭލުން 60 ދުވަހުގެ ތެރޭގައި އެ ޤައުމުގެ ސިފައިން މަޑުމަޑުން އަނބުރާ ގެންދާނެ އެވެ. އަދި ލުބުނާނުގެ ސިފައިން އިޒްރޭލާއި އިންވެގެންވާ ސަރަހައްދުތަކުގެ ބާރު ހިފަހައްޓާނެ އެވެ. މިއީ ހިޒްބުއްލާއަށް އެ ސަރަހައްދުގައި އަލުން އިންފްރާސްޓްރަކްޗާ ޤާއިމުނުކުރެވޭނެކަން ޔަޤީންކުރުމަށްޓަކަ އެވެ.

ފްރާންސްގެ ރައީސް އެމެނުއެލް މެކްރޯން އެކްސްގައި މި އެއްބަސްވުމުގައި ސޮއިކުރުމާމެދު އުފާފާޅުކުރައްވައި ވިދާޅުވީ، މިއީ އެމެރިކާއާއި އިޒްރޭލާއި ލުބުނާނުގެ އިސްވެރިންނާއެކު މަސްތަކެއް ވަންދެން ކުރެވުނު މަސައްކަތުގެ ނަތީޖާ ކަމަށެވެ.

މީގެ ކުރިން ލުބުނާނުގެ ހާރިޖީ ވަޒީރު ޢަބްދުﷲ ބޫ ހަބީބް ވިދާޅުވެފައިވަނީ އިޒްރޭލު ސިފައިން އަނބުރާ ގެންދާއިރު، ދެކުނު ލުބުނާނުގައި މަދުވެގެން 5،000 ސިފައިން ބޭތިއްބުމަށް ލުބުނާނުގެ ސިފައިން ތައްޔާރަށް ތިބޭނެ ކަމަށެވެ.

ނަތަންޔާހޫ ކުރިން ވިދާޅުވެފައިވަނީ ހަނގުރާމަ ހުއްޓާލުމުގެ އެއްބަސްވުން ތަންފީޒުކުރުމަށް ތައްޔާރަށް ހުރި ކަމަށާއި، ހިޒްބުއްލާއިން އެއްބަސްވުމާ ހިލާފުވެއްޖެނަމަ ވަރުގަދައަށް ޖަވާބުދާރީވާނެ ކަމަށެވެ.

އޭނާގެ ސަރުކާރުގެ ތެރެއިން މި އެއްބަސްވުމަށް ބައެއް ފަރާތްތަކުން އިދިކޮޅު ހަދާއިރު، ނަތަންޔާހޫ ވިދާޅުވީ މި އެއްބަސްވުމުގެ ސަބަބުން އީރާނުގެ ނުރައްކަލަށް އިޒްރޭލަށް ފޯކަސްކުރެވޭނެ ކަމަށާއި، ހުސްވެފައިވާ ހަތިޔާރުތައް އަލުން ފުރިހަމަކުރެވި، ސިފައިންނަށް އަރާމުކުރުމުގެ ފުރުސަތު ލިބޭނެ ކަމަށެވެ. އަދި 2023 ގައި ގާޒާއިން އިޒްރޭލަށް ހަމަލާދީ މި ސަރަހައްދުގައި ހަނގުރާމަ ފެށި ހަމާސް އެކަހެރިކުރެވޭނެ ކަމަށްވެސް އޭނާ ވިދާޅުވި އެވެ.

ނަތަންޔާހޫ ވިދާޅުވި ގޮތުގައި އީރާނުގެ އެހީތެރިކަން ލިބޭ ހަމާސްއާ އިއްތިހާދުވެފައިވާ ހިޒްބުﷲ މިހާރު ވަނީ ހަނގުރާމަ ފެށުނުއިރު އޮތް ހާލަތަށްވުރެ ބޮޑަށް ބަލިކަށިވެފައި ކަމަށެވެ.

އިޒްރޭލުގެ މި އެއްބަސްވުމާ ދެކޮޅު ފަރާތްތަކުގެ ތެރޭގައި އިދިކޮޅު ލީޑަރުންނާއި އިޒްރޭލާއި ލުބުނާނުގެ ބޯޑަރު ކައިރީގައި ހުރި ރަށްތަކުގެ ވެރިން ހިމެނެ އެވެ. މި ފަރާތްތަކުން ބޭނުންވަނީ ލުބުނާނުގެ ބޯޑަރު ސަރަހައްދުގައި މީހުން ނޫޅޭ ބަފަރ ޒޯނެއް އުފެއްދުމަށެވެ.

ލުބުނާނުގެ ސަރުކާރާއި ހިޒްބުއްލާއިން ބާރުއަޅަނީ ދެކުނު ލުބުނާނުން ފައިބާފައިވާ އާންމު ރައްޔިތުން އަނބުރާ އެ ސަރަހައްދަށް ގެނައުމަކީ މި ހަނގުރާމަ ހުއްޓާލުމުގެ އެއްބަސްވުމުގެ މުހިންމު ބައެއްގެ ގޮތުގަ އެވެ.