އެތައް ފަހަރެއްގެ މަތިން ފަސްކުރި ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބުގެ ވޯޓްލުން މިއަދު ފަށައިފި އެވެ.

ޕީއެންސީގެ އިންތިހާބު ފުރަތަމަ ބާއްވަން ހަމަޖެއްސީ އޮކްޓޫބަރު 19 ވަނަ ދުވަހު އެވެ. ނަމަވެސް 28 ސެޕްޓެމްބަރުގައި ވަނީ އިންތިހާބު ފަސްކުރިކަން އިއުލާންކޮށް، ނޮވެމްބަރު 9 ގައި ބޭއްވުމަށް ހަމަޖައްސާފަ އެވެ. އޭގެ ފަހުން 2 ނޮވެމްބަރުގައި ވަނީ ތިންވަނަ ފަހަރަށް އިންތިހާބު ފަސްކޮށް މިއަދު، 23 ނޮވެމްބަރުގައި އިންތިހާބު ބާއްވަން ނިންމާފަ އެވެ.

އެ ޕާޓީގެ އިންތިހާބުގައި 1984 މަގާމަށް މީހުން އިންތިހާބުކުރަން ވަނީ ހަމަޖެހިފަ އެވެ. މީގެ ތެރެއިން 1300 މަގާމަށް އެންމެ ކެންޑިޑޭޓަކު ކުރިމަތިލާފައިވާތީ، އެ 1300 މަޤާމަށް އިންތިހާބަކާ ނުލައި މީހުން ހޮވިފައިވާ ކަމަށް ޕީއެންސީން ބުނެ އެވެ.

އެހެންކަމުން މިއަދު ވޯޓް ލަނީ 648 މަގާމަށް މީހުން އިންތިހާބުކުރުމަށެވެ.

ޕީއެންސީގެ އިންތިހާބުގައި ހޮވުމަށް ހަމަޖެހިފައިވަނީ ދާއިރާ ރައީސުންނާއި، ދާއިރާ ނައިބްރައީސުންނާއި، ޒުވާނުންގެ ހަރަކާތުގެ ރަށު ރައީސްއާއި، އަންހެނުންގެ ހަރަކާތުގެ ރަށު ރައީސްއާއި، ސްޓިއަރިން ކޮމިޓީގެ މެންބަރުން އަދި އެ ކޮމިޓީގެ އިންތިހާބީ މަގާމުތަކެވެ.

އިންތިހާބުގައި ވާދަކުރާ ކެނޑިޑޭޓުންގެ ލިސްޓް އާއްމުކުރިއިރު، ލިސްޓު ގަޑުބަޑުކޮށް އޮޅުވާލާފައިވާކަމުގެ ޝަކުވާ ބޮޑުވެ ފުރަތަމަ އާއްމުކުރި ލިސްޓު ބާތިލުކޮށްފައިވެ އެވެ. އިންތިހާބުގައި ވާދަކުރުމަށް ފޯމް ލާފައިވާ ބައެއް ފަރާތްތަކުގެ ނަން ލިސްޓުގައި ނެތުމާއި ފޯމް ނުލާ ބައެއް މީހުންގެ ނަން ލިސްޓުގައި ހިމަނާފައިވާކަމަށް ޕީއެންސީގެ ބައެއް މެންބަރުން ބުނެފައިވެ އެވެ.

މިގޮތަށް ބޮޑަށް ބަދަލުކޮށްފައިވަނީ ވަކިބަޔަކު އިންތިހާބުކުރުމަށް ލީޑަޝިޕުން ބޭނުންވާ ދާއިރާތަށްކަމަށްވެސް މެންބަރުން ބުނެ އެވެ. މިކަމާއި ގުޅިގެން ޕީއެންސީން ބުނެފައިވަނީ އެ މައްސަލަ ދިމާވީ އިދާރީ އޮޅުމަކުން ކަމަށެވެ.