ބެން އެފްލެކްއާއި ޖެނިފާ ލޮޕޭޒް (ޖޭލޯ)ގެ ކައިވެނި ރޫޅުމަށްފަހު ޖޭލޯއާ އެއްވެސް ގުޅުމެއް ބާއްވަން ބެންގެ ކުރީގެ އަންހެނުން ޖެނިފާ ގާނާ ބޭނުންނުވާ ކަމަށް ރިޕޯޓުތައް ބުނެފި އެވެ.

ޖެނިފާއާ ގާތް ފަރާތަކާ ހަވާލާދީ ބައެއް ހަބަރުތައް ބުނާ ގޮތުގައި އޭނާއާއި ބެންގެ ދަރިންގެ ކަމެއްގައި ނޫން ގޮތަކަށް ޖޭލޯއާ ވާހަކަ ދައްކަން އޭނާ ބޭނުންނުވާ ކަމަށެވެ.

ޖެނިފާ ވަނީ އޭނާގެ ކުރީގެ ފިރިމީހާ ބެންއާއި ޖޭލޯގެ ކައިވެނީގައި ޖެހިފައިވާ މައްސަލަތައް ހައްލުކުރަން އެ ދެމީހުންނަށް އެހީތެރިވެ ދީފަ އެވެ.

އެހެން ނަމަވެސް ބެންއާއި ޖޭލޯއާ ދެމެދު "ތާށިވެފައި" ހުރިކަމުގެ އިހުސާސެއް ޖެނިފާއަށް ކުރެވުނު ކަމަށާއި އެހެން ކަމުން ދެން ޖޭލޯއާއެކު އެއްވެސް ގުޅުމެއް ބާއްވަން ޖެނިފާ ގަސްދު ނުކުރާ ކަމަށް ހަބަރުތައް ބުނެ އެވެ.

ބެންއާއި ޖެނިފާ ކައިވެނި ކޮށްގެން އުޅުނީ 2005 ވަނަ އަހަރުން ފެށިގެން 2018 އަށެވެ. އެ ކައިވެންޏަށް ތިން ދަރިން ލިބިފައިވާއިރު ބެންއާއި ޖެނިފާގެ ދެމެދު އަދިވެސް އެކުވެރިކަން އޮވެ އެވެ.

ޖެނިފާއާއެކު ކުރި ކައިވެނި ރޫޅުމަށްފަހު ބެން ވަނީ 2022 ވަނަ އަހަރު ޖޭލޯއާ ކައިވެނި ކޮށްފަ އެވެ. އެހެން ނަމަވެސް ދެ އަހަރަށްފަހު އެ ކައިވެނި ވެސް ވަނީ ރޫޅިފަ އެވެ.