90ގެ ކުރީކޮޅުގެ އަހަރުތަކުގައި ބޮލީވުޑުން ވިދާލި ތަރިއެއް ކަމަށްވާ ދިވްޔާ ބާރްތީ އުމުރުން އެންމެ 19 އަހަރުގައި މަރުުވުން ވެގެންދިޔައީ ގިނަ ބަޔަކަށް ލިބުނު ސިހުމަކަށެވެ.

ދިވްޔާ މަރުވީ 1993 ވަނަ އަހަރު އޭނާ ދިރިއުޅެމުން ދިޔަ އެޕާޓްމަންޓްގެ ބެލްކަނިން ވެއްޓިގެންނެވެ. އޭނާގެ މަރާ ގުޅިގެން އެތައް ވާހަކައެއް ދެކެވުނުއިރު އޭނާ މަރާލީ އޭނާގެ ފިރިމީހާ ސާޖިދު ނަޑިއާވާލާ ކަމަށް ވެސް ވާހަކަ ފެތުރުނެވެ.

އެހެން ނަމަވެސް ފުލުހުންގެ ތަހުގީގު ނިމުނީ އޭނާ ބެލްކަނިން ވެއްޓުނީ ބެލްކަންޏަށް ނުކުމެ އުޅުމުގެ ތެރޭގައި އަރިއަޅާލައިގެން ކަމަށް ބުނެ އެވެ.

ދިވްޔާގެ މަރަށް 30 އަހަރު ވީފަހުން އޭނާއާ ގާތްކޮށް އުޅުނު ރައްޓެއްސެއް ކަމަށްވާ ގުއްޑީ މާރޫތީ މިވަނީ އެމަރާ ބެހޭގޮތުން ކުރިން އަޑު އިވިފައިނުވާ ވާހަކަތަކެއް ކިޔައިދީފަ އެވެ.

ގުއްޑީ ބުނީ ދިވްޔާއަކީ ވަރަށް ހަލަނިކޮށް "ފުރާނަ އަތް މައްޗަށް ލައިގެން" ދިރިއުޅުނު ފަރާތެއް ކަމަށާއި އެއްވެސް ކަމެއް ކުރަން އޭނާ ބިރު ނުގަންނަ ކަމަށެވެ.

"އަހަންނަކަށް ނޭނގެ އޭނާގެ ކުޑައިރުގެ ދިރިއުޅުން އޮތް ގޮތެއް. އެކަމަކު އޭނާ އުޅޭ ގޮތުން ހީވަނީ އޭނާއަށް ނަފްސާނީ އުނދަގޫތަކެއް ހުރިހެން" ގުއްޑީ ބުންޏެވެ.

1991 ވަނަ އަހަރު ބޮލީވުޑަށް ތައާރަފްވި ދިވްޔާއަކީ އޭރު އެ ދާއިރާގައި އެންމެ އުއްމީދީ ފަންނާނުގެ ގޮތުގައި ބެލެވުނު ތަރި އެކެވެ.