ހޮލީވުޑްގެ މަޝްހޫރު ތަރި މެތިއު ޕެރީ މަރުވިތާ އެއް އަހަރު ފުރެން ގާތްވެފައި ވަނިކޮށް އޭނާގެ ގެ އެންމެ ފަހުން ވިކިފައިވާ ކަމަށް ހަބަރުތައް ބުނެފި އެވެ.

ރިޕޯޓުތައް ބުނާ ގޮތުގައި ޕެސިފިކް ޕެލިސޭޑްސްގައި ހުންނަ މެތިއުގެ އެ ގެ ގަނެފައިވަނީ ހޮލީވުޑަށް ނިސްބަތްވާ ފިލްމު ޕްރޮޑިއުސަރެކެވެ.

އެ ގެއަކީ މިދިޔަ އަހަރުގެ އޮކްޓޯބަރު މަހުގެ 28 ވަނަ ދުވަހު މެތިއު މަރުވެފައި އޮއްވާ ފެނުނު ގެ އެވެ. އޭނާ މަރުވެފައި އޮއްވާ ފެނުނީ އެގޭގެ ފާހާނާއެއްގައި ހުރި ބިލިގާއެއްގެ ތެރެއިންނެވެ.

ރެކޯޑުތަކުން ދައްކާ ގޮތުގައި 2020 ވަނަ އަހަރު 3500 އަކަފޫޓުގެ އެ ގެ މެތިއު ގަނެފައިވަނީ ހަ މިލިއަން ޑޮލަރަށެވެ. އެހެން ނަމަވެސް އެ ގެ ވިކިފައިވަނީ 8.55 މިލިއަން ޑޮލަރަށެވެ.

ބިލިގާގެ ތެރޭގައި ގެނބިގެން މެތިއު މަރުވި ކަމަށް ބެލެވުނު ނަމަވެސް ކުރެވުނު ތަހުގީގުތަކުން އޭނާ މަރުވީ ކެޓަމަނައިން ޑްރަގް އޯވާޑޯޒް ވެގެންކަން އެނގުނެވެ.

އެ މައްސަލައިގައި މެތިއުގެ ބައެއް ގާތް ފަރާތްތަކަށް ތުހުމަތު ކުރެވޭއިރު އެ މައްސަލައިގެ ޝަރީއަތްތައް މިހާރު ކުރިއަށް އެބަދެ އެވެ.

މެތިއު މަޝްހޫރުވެފައިވަނީ 1994 ން 2004 އަށް ކުރިއަށް ގެންދިޔަ މަޝްހޫރު ސިޓްކޮމް "ފްރެންޑްސް"ގައި އޭނާ ދައްކުވައިދިން ރޯލުންނެވެ.