ފުޅާ ދާއިރާއެއްގައި ހަށި ވިއްކަމުންދިޔަ ހަތް އަންހެނަކާއި ދެ އެޖެންޓަކު އަތުލައިގެންފި އެވެ.

އިމިގްރޭޝަނުން މިއަދު ބުނީ މި މީހުން އަތުލައިގަތީ ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދާ ބިދޭސީން ހޯދުމަށް އިމިގްރޭޝަނާއި ފުލުހުން ގުޅިގެން މި އޮކްޓޫބަރު މަހު ހިންގި ހާއްސަ އިންސްޕެކްޝަން ތަކުގެ ތެރެއިން ކަމަށެވެ.

އެގޮތުން މިފަދަ ފަސް މައްސަލައަކާއި ގުޅިގެން ބިދޭސީ ހަތް އަންހެނަކު އަދި އެޖެންޓުންގެ ގޮތުގައި މަސައްކަތް ކުރަމުންދިޔަ ބިދޭސީ ދެ ފިރިހެނަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް އިމިގްރޭޝަނުން ބުންޏެވެ.

މި މައްސަލަތައް ތަހުގީގު ކުރުމަށްފަހު ރާއްޖެ އަނބުރާ ނާދެވޭ ގޮތަށް މީގެތެރެއިން ފަސް އަންހެނަކު އަދި އެއް ފިރިހެނަކު މިހާރު ވަނީ ޑީޕޯޓުކޮށްފައިކަމަށާއި އަދި އަނެއް ތިން ބިދޭސީން ޑީޕޯޓުކުރުމުގެ މަސައްކަތް މިހާރުދަނީ ކުރަމުންކަމުގައިވެސް އިމިގްރޭޝަނުން ބުނެ އެވެ.

އިމިގްރޭޝަނުން ގަވައިދާ ހިލާފަށް އުޅޭ ބިދޭސީން ހޯދުމަށް ހިންގި ހާއްސަ އޮޕަރޭޝަން ތަކުގައި މިހާތަނަށް 4000 އަށްވުރެ ގިނަ ބިދޭސީން ވަނީ ޑީޕޯޓްކޮށްލާފަ އެވެ.