އަންނަ މަހު އަލުން ޑޮމެއިން ނަންބަރު ދޫކުރަން ފަށަން ޓްރާންސްޕޯޓް މިނިސްޓްރީން ނިންމައިފި އެވެ.

ޓްރާންސްޕޯޓް މިނިސްޓްރީން ނެރުނު ނޫސް ބަޔާނެއްގައި ވަނީ އަލުން ޑޮމެއިން ހިދުމަތް ދިނުުގެ މަސައްކަތް ފަށާނީ ރެކޯޑުތައް ބަލަހައްޓާ އަދި މޮނިޓާ ކުރާނެ ހަރުދަނާ ނިޒާމެއް ގާއިމުކުރުމުގެ އިތުރުން ކުރި މަގުގައި ދިމާވެދާނެ މައްސަލަތައް މަދު ކުރުމަށް އެކަށީގެންވާ ފުރިހަމަ ގަވާއިދެއް އެކުލަވާލައި، ދެމެހެއްޓެނިވި ގޮތެއްގައި އެ ހިދުމަތް ފޯރުކޮށްދިނުމަށް ކަމަށެވެ.

"އަލުން މި ހިދުމަތް ފެށުމުގައި ކުރިމަތިވެފައިވާ އެންމެ ބޮޑު ގޮންޖެހުމަކީ، ވެއެތުވެދިޔަ ތަނުގައި ޑޮމެއިންގެ ރެކޯޑުތައް ހަރުދަނާ ގޮތެއްގައި މިނިސްޓްރީގައި ބެލެހެއްޓިފައި ނެތުމާއި ހިދުމަތް ފޯރުކޮށްދިނުމުގައި އަމަލު ކުރާނެ ހަރުދަނާ އުސޫލުތަކެއް އެކުލަވާލާފައި ނެތުމެވެ،" އެ ބަޔާނުގައިވެ އެވެ.

އަލަށް ގެންނަ ބަދަލުތަކާ އެކު ޑޮމެއިން ހިދުމަތް ފޯރުކޮށްދިނުމަށް ދޫކުރެވޭ އެންމެހައި ލިޔެކިޔުންތަކަކީ ސެކިއުރިޓީ ފީޗާސްތައް އެކުލެވޭ ލިޔުންތަކަކަށް ބަދަލު ވާނެ ކަމަށް ވެސް އެ މިނިސްޓްރީން ބުންޏެވެ.

އެގޮތުން އެ މަސައްކަތުން އެއްވެސް ފަރާތެއްގެ ހައްގަށް އުނިކަމެއް އަންނާނެ ކަމެއް ދިމާނުވާނެ ކަމުގެ ފުރިހަމަ ޔަގީންކަން އެ މިނިސްޓްރީން ވަނީ އަރުވާފަ އެވެ. އެ މިނިސްޓްރީގެ މަގުސަދަކީ ޑޮމެއިން ނަންބަރުތަކާ ގުޅިގެން ދިމާވެފައިވާ މައްސަލަތަކަށް ގާނޫނާއި ގަވާއިދުގެ ތެރެއިން ހައްލު ގެނައުން ކަމަށް ވެސް އެ ބަޔާނުގައިވެ އެވެ.

ޑޮމެއިން ނަންބަރުތައް ވިއްކުމުގައި ކޮރަޕްޝަންގެ އަމަލުތަކެއް ހިންގާކަން ފާހަގަ ޑޮމެއިން ނަންބަރުތައް ވިއްކުން ހުއްޓާލީ ނިމިދިޔަ ސަރުކާރުންނެވެ.