ހަޔާ އެޑިއުކޭޝަން މިނިސްޓްރީގެ ސްޓޭޓް މިނިސްޓަރުކަމުން އަބްދުﷲ ފައިރޫޝް ވަކިކޮށްފި އެވެ.

އޭނާ އަކީ ކުރީގެ އެސިސްޓެންޓް ޕޮލިސް ކޮމިޝަނަރެވެ. އެކްސްގައި ކުރެއްވި ޕޯސްޓެއްގައި ފައިރޫޝް ވިދާޅުވީ މަގާމު އަދާކުރެއްވި ދުވަސްވަރު ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާ އަދި އެ ވުޒާރާގެ ޓީމުން ދިން އެއްބާރުލުމަށް ޝުކުރުއަދާކުރައްވާ ކަމަށެވެ.

ފައިރޫޝް މަގާމުން ވަކިކޮށްފައި މިވަނީ ސިޔާސީ މަގާމްތަކުން ގިނަ ބަޔަކު ވަކިކުރައްވާނެ ކަމަށް ރައީސް ޑރ. މުހައްމަދު މުއިއްޒު އިއުލާން ކުރައްވާފައި ވަނިކޮށެވެ. އިގްތިސޯދީ ރިފޯމް އެޖެންޑާގެ ދަށުން ސިޔާސީ މަގާމުގައި ތިއްބެވި 228 ބޭފުޅަކު ވަކިކުރައްވަން ނިންމަވާފައިވާ ކަމަށް ދާދިފަހުން ރައީސް މުއިއްޒު ވަނީ އިއުލާން ކުރައްވާފަ އެވެ.

އެގޮތުން 7 ސްޓޭޓް މިނިސްޓަރުންނާއި، 43 ޑެޕިއުޓީ މިނިސްޓަރުން، 109 ސީނިއާ ޕޮލިޓިކަލް ޑައިރެކްޓަރުންގެ އިތުރުން 69 ޕޮލިޓިކަލް ޑައިރެކްޓަރުން ވަޒީފާއިން ވަކިކުރެއްވުމަށް ރައީސް ވަނީ ނިންމަވާފަ އެވެ.

ރައީސް ވިދާޅުވީ މިކަމުގެ ސަބަބުން ދައުލަތު ބަޖެޓުން 5.714 މިލިއަން ރުފިޔާ ސަލާމަތް ކުރެވޭނެ ކަމަށެވެ.

ރައީސް ސިޔާސީ މަގާމު މަދުކުރައްވަން ނިންމަވާފައިވާއިރު، ސިޔާސީ މަގާމުތަކުގެ އަދަދު ސަރުކާރުން ވަނީ ސިއްރުކޮށްފަ އެވެ. އިދިކޮޅު އެމްޑީޕީން ތުހުމަތު ކުރާގޮތުގައި ސިޔާސީ މަގާމުތަކުގެ އަދަދު 2000 އަށްވުރެ ގިނަ އެވެ.

ރާއްޖޭގެ އިގްތިސޯދީ އަދި މާލީ ހާލަތު ދައްވުމުގެ ސަބަބުން ހަރަދު ކުޑަކުރުމަށް އަވަސް ފިޔަވަޅުތަކެއް އަޅަންޖެހޭކަމަށް މިދިޔަ ހަފްތާގައި ވޯލްޑް ބޭންކުން އާއްމުކުރި ރިޕޯޓެއްގައި ވަނީ ބުނެފަ އެވެ.