2004 ވަނަ އަހަރު ރިލީޒްކުރި ބޮލީވުޑް ފިލްމު "މާޑާ"އަށްފަހު އާއްމުންގެ ފުރައްސާރަ އަމާޒުވި ކަމަށް އެ ފިލްމުގެ ލީޑު އަންހެން ތަރި މަލިކާ ޝަރާވަތު ބުނެފި އެވެ.

ދާދި ފަހުން މީޑިއާއަށް ދިން އިންޓަވިއުއެއްގައި މަލިކާ ބުނެފައިވަނީ މާޑާގެ ސަބަބުން އޭނާއަށް އާއްމުންގެ މަގުބޫލުކަމާއި މާލީ މިނިވަންކަން ލިބުނު ކަމަށެވެ.

އެހެން ނަމަވެސް އެއާއެކު ގިނަ ބައެއްގެ ފުރައްސާރަ ވެސް އަމާޒުވި ކަމަށް މަލިކާ ބުންޏެވެ. އެގޮތުން އެ ފިލްމުގައި އޭނާ ދައްކުވައިދިން ކެރެކްޓަރުގެ ސަބަބުން ގިނަ ދުވަސްތަކެއް ވަންދެން ފުރައްސާރައާ ކުރިމަތިލާން ޖެހުނު ކަމަށް އޭނާ ބުނެ އެވެ.

2003 ވަނަ އަހަރު ނެރުނު ފިލްމު "ޚުވާއިޝް"އިން ބޮލީވުޑަށް ތައާރަފްވި މަލިކާ އާއްމުންގެ ސަމާލުކަމަށް އައީ އިމްރާން ހަޝްމީއާއި އަޝްމިތު ޕަޓޭލްއާއެކު ފެނިގެންދިޔަ "މާޑާ"އިންނެވެ.

އަނޫރާގް ބާސޫ ޑައިރެކްޓްކުރި މާޑާއަށްފަހު މަލިކާ ވަނީ ބޮލީވުޑްގެ ގިނަ ފިލްމުތަކަކުން ފެނިގެން ގޮސްފަ އެވެ. އޭގެ ތެރޭގައި "ވެލްކަމް"، "ޑަބަލް ދަމާލް" އަދި "ހިސް" ހިމެނެ އެވެ.

އަހަރުތަކެއްގެ މެދުކެނޑުމަކަށްފަހު މަލިކާ މިހާރު މިވަނީ ބޮލީވުޑަށް އެނބުރި އައިސްފަ އެވެ. އޭނާގެ ކުރިއަށް އޮތް މަސައްކަތަކީ ރާޖްކުމާރް ރާއޯއާއި ޓްރިޕްތީ ޑިމްރާ ފެނިގެންދާ "ވިކީ ވިދްޔާ ކާ ވޯ ވާލާ ވީޑިއޯ" އެވެ.