އިންޑިއާގެ އަސްކަރިއްޔާ ރާއްޖޭން ބޭރުކުރަން ރައީސް ޑރ. މުހައްމަދު މުއިއްޒު ވީ ވައުދާ ހިލާފަށް އެގައުމުގެ އަސްކަރީ އުޅަނދުތަކެއް ރާއްޖެ ގެންނަން އެއްބަސްވެއްޖެ އެވެ.

މިކަން ހާމަވީ ރައީސް ޑރ. މުހައްމަދު މުއިއްޒު އިންޑިއާއަށް މިހާރު ކުރައްވާ ރަަސްމީ ދަތުރުގައި އެގައުމުގެ ބޮޑުވަޒީރު ނަރެންދުރަ މޯދީއާ ބައްދަލުކުރައްވައި، ދެބޭފުޅުން ކުރެއްވި މަޝްވަރާއަށް ފަހު، ރައީސް އޮފީހުން އިއްޔެ ޝާއިއުކުރި ޖޮއިންޓް ޕްރެސް ރިލީޒްއިންނެވެ.

އޭގައިވާގޮތުން އިންޑިއާގެ އަސްކަރީ އުޅަނދުތައް ފޯރުކޮށްދޭނީ ކަނޑުމަގުން ރާއްޖޭގެ ސަލާމަތާއި ރައްކާތެރިކަން ބެލެހެއްޓުމުގައި އެމްއެންޑީއެފްގެ ގާބިލުކަން އިތުރުކުރުމަށެވެ.

މިހާރުވެސް ރާއްޖޭގައި އެ ގައުމުގެ ޑޯނިއާ މަތިންދާބޯޓާއި ދެ ހެލިކޮޕްޓަރެއް އޮޕަރޭޓްކުރެ އެވެ. އެ އުޅަނދުތައް ރާއްޖޭގައި އޮޕަރޭޓް ކުރާތީ އެކަމާ ދެކޮޅަށް ރައީސް މުއިއްޒު ހިމެނޭހެން މި ސަރުކާރުގެ އިސްވެރިން ވަނީ މިދިޔަ ފަސް އަހަރުގެ ތެރޭގައި އެއްވުންތަކާއި ޖަލްސާތައް ބާއްވައިފަ އެވެ.

ނަމަވެސް ވެރިކަމަށް ވަޑައިގަތުމަށްފަހު ރައީސް މުއިއްޒު އަމަލުކުރަމުން މިގެންދަނީ ވެރިކަމަށް ވަޑައިގަތުމަށް ދެއްކެވި ވާހަކަފުޅުތަކާ ދިމާ އިދިކޮޅަށެވެ.

ރާއްޖޭގައި ތިބި ޔުނިފޯމް އެޅި އިންޑިއާ ސިފައިން ފޮނުވާލައި އުޅަނދު އޮޕަރޭޓްކުރާ އަސްކަރީ އުޅަނދު އޮޕަރޭޓްކުރުމުގެ ތަމްރީނު ލިބިފައިތިބި ބަޔަކު ވަނީ ގެނެސްފަ އެވެ. އެއަށްފަހު ރައީސް މުއިއްޒު ކުރިން ވަނީ އިންޑިއާގެ ސިފައިން ރާއްޖެއިން ބޭރުކޮށްލަންވީ ވައުދު ފުއްދުނީ ކަމަށް އިއުލާން ކުރައްވާފަ އެވެ.

މިދިޔަ ފަސް އަހަރު ބޭއްވި އެކި އެއްވުންތަކުގައި ރައްޔިތުންގެ މަޖިލީހުގެ މިހާރުގެ ރައީސް އަބްދުއްރަހީމް އަބްދުﷲ ވަނީ އެކި ނަންނަމުގައި އިންޑިއާގެ 2000 ސިފައިން ރާއްޖޭގައި ތިބި ކަމަށް ވިދާޅުވެފަ އެވެ. އެގޮތުން ޔުނިފޯމް ނާޅާ އިންޑިއާގެ ސިފައިން ވެސް ރާއްޖޭގައި ތިބި ކަމަށް އަބްދުއްރަހީމް މީގެކުރިން ވިދާޅުވެފައިވެ އެވެ.