ދައުލަތުގެ މާލީ ހާލަތު ދަށްވެ ހަރަދުތައް ކުޑަކުރަން އަންގާފައި ވަނިކޮށް މިއަހަރު އެކަނި ވެމްކޯއިން 850 މުވައްޒަފުންނަށް ވަޒީފާދީފި އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން "ހުރިހާ" އިން ހުށަހެޅި އާރްޓީއައި އަށް ވެމްކޯއިން ދިން ޖަވާބުގައިވާގޮތުން ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތް ދުވަހުން ފެށިގެން މިދިޔަ އަހަރުގެ ނިޔަލަށް ޖުމްލަ 40 މުވައްޒަފުންނަށް ވަނީ ވަޒީފާދީފަ އެވެ.

ހަމައެހެންމެ މި އަހަރުގެ ޖެނުއަރީ މަހުން ފެށިގެން ސެޕްޓެމްބަރު މަހުގެ ނުވަ ވަނަ ދުވަހުގެ ނިޔަލަށް 850 މީހުންނަށް ވަޒީފާ ދީފައިވާ ކަމަށް ވެސް އެ ކުންފުނިން ހިއްސާކުރި މައުލޫމާތުގައިވެ އެވެ.

މިދިޔަ އަހަރު 27 މީހަކު ވަޒީފާއިން ވަކިކޮށްފައިވާއިރު، މި އަހަރު 62 މީހަކު ވަނީ ވަޒީފާއިން ވަކިކޮށްފަ އެވެ.

އެ ކުންފުނިން އެންމެ ގިނައިން ވަޒީފާ ދީފައި ވަނީ މާލެ ސަރަހައްދުންނެވެ.

ރައްޔިތުންގެ މަޖިލީހުގެ އިންތިހާބާ ދިމާކޮށް ވެސް ސަރުކާރުގެ ކުންފުނިތަކުން ވަނީ ގިނަ ބަޔަކަށް ވަޒީފާ ދީފަ އެވެ. އަދި އިންތިހާބު ނިމުމާއެކު ގިނަ ބަޔަކު ވަނީ ވަޒީފާއިން ވަކިކޮށްފަ އެވެ.