އެމެރިކާގެ ކުރިއަށް އޮތް ރިޔާސީ އިންތިހާބުގައި ވާދަކުރާ ކެނޑިޑޭޓުންގެ ތެރެއިން ޑިމޮކްރެޓިކްސްގެ ކެނޑިޑޭޓް ކަމަލާ ހެރިސްއަށް މަޝްހޫރު ލަވަކިޔުންތެރިޔާ ޓޭލާ ސްވިފްޓްގެ ތާއީދު އޮތްކަން އޭނާ ހާމަކޮށްފި އެވެ.

ދާދި ފަހުން އޮތް އެމެރިކާގެ ރިޔާސީ ބަހުސަކަށްފަހު ސޯޝަލް މީޑިއާގައި އާއްމުކުރި ބަޔާނެއްގައި ޓޭލާ ބުނެފައިވަނީ ކަންކަމުގެ ދެކޮޅު ބެލުމަށްފަހު އޭނާގެ ވޯޓު ކަމަލާއަށް ދޭން ނިންމާފައިވާ ކަމަށެވެ.

"ތިޔަ އެންމެން ވެސް މިކަމާ ވިސްނުމެއް ހިންގާފައި ނުވާނަމަ މިއީ ވިސްނަންވީ ވަގުތު. އަދި އެންމެ ރަނގަޅު ނިންމުން ނިންމަންވީ ވަގުތު" ޓޭލާ ބުނެފައިވެ އެވެ.

ޓޭލާ އިތުރަށް ބުނީ އޭނާ ކަމަލާއަށް ވޯޓުދޭން ނިންމީ ކަމަލާއަކީ ހުރިހާ އެންމެންގެ ހައްގުތަކަށް ވަކާލާތުކުރާ، އެއްގޮތެއްގައި ދެމިހުންނަ އޯގާތެރި ލީޑަރަކަށްވާތީ ކަމަށެވެ.

އެއާއެކު އުމުރުން 34 އަހަރުގެ ޓޭލާ ވަނީ ކަމަލާއާ އެންމެ ގާތުން ވާދަކުރާ ރިޕަބްލިކް ޕާޓީގެ ކެނޑިޑޭޓް ޑޮނަލްޑް ޓްރަމްޕްއަށް ބަހުގެ ހޫނު ހަމަލާތަކެއް ވެސް ދީފަ އެވެ.

އެގޮތުން މިއަހަރުގެ ކުރީކޮޅު ޓްރަމްޕްގެ ކެމްޕެއިން ޓީމުން އާއްމުކުރި އޭނާގެ ދޮގު ފޮޓޯތަކާއެކު މި އިންތިހާބުގައި އޭނާގެ ވިސްނުން އޮތް ގޮތް ވަރަށް ސާފުކޮށް އެންމެންނަށް ބުނެދޭން ޖެހޭކަން ވިސްނުނު ކަމަށް އޭނާ ބުންޏެވެ.

މީގެ ދެތިން މަސް ކުރިން ޓްރަމްޕްގެ ޓީމުން ވަނީ ޓޭލާ އޭނާއަށް ސަޕޯޓުކުރާކަން ދޭހަވާ ގޮތަށް އާޓިފިޝަލް އިންޓެލިޖެންސް ބޭނުންކޮށްގެން ހަދާފައިވާ ފޮޓޯތަކެއް އާއްމުކޮށްފަ އެވެ.

އެ ފޮޓޯތަކަށް އޭރު ޓޭލާ ރައްދު ދީފައި ނުވި ނަމަވެސް ފާޅުގައި ކަމަލާއަށް ތާއީދު ކުރުމަކީ ޓްރަމްޕްއާއި އޭނާގެ ޓީމަށް ޖަވާބުދާރީވުން ކަމަށް ގިނަ ބަޔަކު ބުނެ އެވެ.