ކުރީ ސަރުކާރުން ހިންގި ގެދޮރުވެރިޔާ ސްކީމްގެ ދަށުން 4,000 ފްލެޓް ލިބޭ މީހުންގެ ފައިނަލް ލިސްޓް އަންނަ އޮކްޓޫބަރު މަހުގެ ތެރޭގައި ހާމަ ކުރެވޭނެ ކަމަށް ހައުސިން މިނިސްޓަރު އަލީ ހައިދަރު އަހުމަދު ވިދާޅުވެއްޖެ އެވެ

މިނިސްޓަރު މިހެން ވިދާޅުވީ 4000 ފްލެޓް ދޫކުރުގެ މަސައްކަތުގެ ފަހުގެ އަޕްޑޭޓް ހޯދުމަށް ހައުސިން މިނިސްޓްރީގެ އިސް ވެރިން ޕެޓިޝަން ކޮމެޓީއަށް އިއްޔެ ހާޒިރުވެ މައުލޫމާތު ދެއްވަމުންނެވެ.

ޕެޓިޝަން ކޮމިޓީން މިނިސްޓްރީގެ ބޭފުޅުން ހާޒިރުކޮށްފައި މިވަނީ ގެދޮރުވެރިޔާ ސްކީމްގެ ދަށުން ފްލެޓް ލިބޭނެކަމަށް ގެޒެޓް ކުރެވިފައިވާ އެންމެހާ ފަރާތްތަކާ އަދި ކަމުގެ މަސްލަހަތު އޮތް އެންމެހާ ފަރާތްތަކުގެ ފްލެޓްތައް ބާތިލް ނުކުރުމަށް އެދި ހުށަހަޅުއްވާފައިވާ ޕެޓިޝަންއާ ގުޅިގެންނެވެ.

ފްލެޓް ލިބޭ ދާއިމީ ލިސްޓަށް ގިނަ އަދަދެއްގެ މީހުން ޝަކުވާ ހުށަހެޅުމާ އެކު އޭސީސީން ތަހުގީގެއް ފަށައި އެ ތަހުގީގުގައި ބެލި ފޯމުތަކުގެ 60 އިންސައްތަ ފޯމަކީ ޝަރުތު ހަމަނުވާ ފޯމުތަކެއް ކަމަށް ވަނީ ބުނެފަ އެވެ. އެހެން ކަމުން މި ސަރުކާރުން ވަނީ އެ ލިސްޓް މުރާޖައާ ކުރުމުގެ މަސައްކަތް ފަށައިފަ އެވެ.

މަޖިލީހުގެ ކޮމެޓީގައި ވާހަކަދައްކަވަމުން މިނިސްޓަރު ހައިދަރު ވިދާޅުވީ މުޅި ލިސްޓް އުވާލަން ސަރުކާރުން ގަސްތު ނުކުރައްވާ ކަމަށެވެ. ލިސްޓް އާންމު ކުރާނީ ފްލެޓް ލިބެނީ އެންމެ ހައްގު މީހާއަށްތޯ ކަށަވަރު ކުރުމަށް ފަހުގައި ކަމަށް ހައިދަރު ވިދާޅުވި އެވެ.

މިނިސްޓަރު ވިދާޅުވީ މިހާރު އިމާރާތް ކުރަން ފަށާފައިވާ 32 ޓަވަރުގެ ތެރެއިން ހަ ޓަވަރުގެ މަސައްކަތް އޮކްޓޫބަރުގެ ނިޔަލަށް މުޅީން ނިންމާލެވޭނެ ކަމަށެވެ. އެހާތަނަށް ލިސްޓް ފައިނަލްކޮށް އާންމު ކުރެވޭނެ ކަމަށް ވެސް ވިދާޅުވި އެވެ.