މިނިސްޓަރ އޮފް ފޮރިން އެފެއާޒް މޫސާ ޒަމީރު ޗައިނާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި ޗައިނާ އިންޓަނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީ (ސިޑްކާ) ގެ ޗެއާމަން ލުއޯ ޖާއޮހުއިއާ މިއަދު ބައްދަލުކުރައްވައިފި އެވެ.

މި ބައްދަލުކުރެއްވުމުގައި، ރާއްޖޭގެ ދެމެހެއްޓެނިވި ތަރައްގީއަށް މުހިއްމު މަޝްރޫއުތަކާގުޅޭ ގޮތުން މަޝްވަރާކުރައްވައި، ޗައިނާ ސަރުކާރުގެ އެހީގައި މިހާރު ކުރިޔަށް ގެންދާ މަޝްރޫއުތަކުގެ އަދާހަމަ ހިއްސާކޮށްފައިވާކަމަށް ފޮރިން މިނިސްޓްރީން ބުނެ އެވެ.

މިނިސްޓަރު ޒަމީރުގެ ވާހަކަފުޅުގައި، ރާއްޖެ އާއި ސިޑްކާ އާދެމެދު އޮތް ގުޅުމުގެ މުހިއްމުކަން ފާހަގަ ކުރައްވައި، ސިޑްކާގެ އެހީގައި މިހާރު ކުރިއަށްދާ މަޝްރޫއުތަކުގެ މައްޗަށް އަލިއަޅުއްވާލެއްވި އެވެ. މީގެ އިތުރުން ސިޑްކާއާ އެކު ގުޅުން ބަދަހިކުރެވޭނެ އާ ފުރުސަތުތަކާ ގުޅޭ ގޮތުން މަޝްވަރާކުރެވުނެވެ. އަދި ރާއްޖޭގެ އުމްރާނީ ތަރައްގީ އާއި އިގްތިސާދީ ކުރިއެރުމަށް، މަޝްރޫއުތައް ތަންފީޒުކުރުމުގެ މުހިއްމުކަމާ ބެހޭ ގޮތުން ވެސް ދެފަރާތުން ވާހަކަފުޅު ދެއްކެވި އެވެ.

މި ބައްދަލުވުމުން ނިންމަވާލައްވަމުން، ސިޑްކާއާ އެކު ގުޅުން އިތުރަށް ބަދަހިކޮށް، މުސްތަޤްބަލުގައި ދެގައުމަށް ފައިދާހުރި މަސައްކަތްތައް ކާމިޔާބުކަމާއެކު ކުރިއަށް ގެންދާނެ ކަމުގެ ޔަގީންކަން ދެފަރާތުން އެރުވި އެވެ.

ފޮރިން މިނިސްޓަރުގެ އަރިހުގައި، މިނިސްޓަ އޮފް ފިނޭންސް، ޑރ. މުޙައްމަދު ޝަފީޤު އާއި، މިނިސްޓަ އޮފް ކޮންސްޓްރަކްޝަން އެންޑް އިންފްރާސްޓްރަކްޗަ، ޑރ. ޢަބްދުﷲ މުއްތަލިބް އާއި، ދިވެހި ރާއްޖެއިން ޗައިނާ އަށް ކަނޑައަޅާފައި ހުންނަވާ ސަފީރު، ޑރ. ފަޒީލް ނަޖީބުގެ އިތުރުން ދިވެހި ސަރުކާރުގެ އިސްބޭފުޅުންނާއި، ބޭޖިންގައި ހުންނަ ދިވެހި ރާއްޖޭގެ އެމްބަސީގެ އޮފިޝަލުން ބައިވެރިވެވަޑައިގެންނެވި އެވެ.

މި ބައްދަލުކުރެއްވުމަށްފަހު ސިޑްކާގެ އެހީގައި ކުރިއަށް ގެންދިއުމަށް ހުށަހަޅާފައިވާ، ރައީސް މުހައްމަދު މުއިއްޒުގެ ސަރުކާރުގެ މުހިއްމު ވައުދުތަކުގެ ތެރޭގައި ހިމެނޭ މާލެ އާއި ވިލިމާލޭގެ މަގުތައް ތަރައްޤީކުރުމުގެ މަޝްރޫއުގެ ފީސިބިލިޓި ސްޓަޑީ ހެދުމުގެ "ލެޓާސް އޮފް އެކްސްޗޭންޖް" ގައި ސޮއި ކުރުމުގެ ރަސްމިއްޔާތުގައި މިނިސްޓަ ޒަމީރު ބައިވެރިވެވަޑައިގަތެވެ. މި "ލެޓާސް އޮފް އެކްސްޗޭންޖް" ގައި ދިވެހި ސަރުކާރުގެ ފަރާތުން ސޮއި ކުރެއްވީ މިނިސްޓަ އޮފް ކޮންސްޓްރަކްޝަން އެންޑް އިންފްރާސްޓްރަކްޗަ، ޑރ. ޢަބްދުﷲ މުއްތަލިބް އެވެ. އަދި ސިޑްކާގެ ފަރާތުން ސޮއި ކުރެއްވީ ޗެއާމަން ލުއޯ ޖާއޮހުއި އެވެ.