ކޮންމެ ދުވަހަކު ވެސް ގިނަ ބަޔަކު ސްޓްރެސްއާ ކުރިމަތިލަ އެވެ. މަސައްކަތާއި އާއިލީ މައްސަލަތަކާއި ސިއްހީ ކަންބޮޑުވުންތަކާއި މާލީ ޒިންމާތަކުގެ ސަބަބުން މީހާ ސްޓްރެސް ވެ އެވެ. މިއީ އެކަމަކު އާންމު ދިރިއުޅުމުގެ ބައެކެވެ. ސްޓްރެސް އަކީ މެނޭޖްކުރަން ދަސްކުރަން ޖެހޭ އެއްޗެކެވެ. މި ކިޔާ ދެނީ ސްޓްރެސް މެނޭޖް ކުރުމަށް ކުރެވިދާނެ ބައެއް ކަންކަމެވެ.

1. ގަވައިދުން ކަސްރަތު ކުރުން

ގަވައިދުން ކަސްރަތުކުރުމަކީ މީހާގެ ސްޓްރެސް ލެވެލް ދަށްކޮށް، މޫޑް ރަނގަޅުކުރުމަށް އެހީތެރިވެދޭ ކަމެކެވެ. ހަފްތާއަކު މަދުވެގެން 3 ފަހަރު ކަސްރަތުކުރަން އާދަ ކުރާށެވެ.

2. ބެލެންސްޑް ޑައިޓެއް ކެއުން

މިއީ ވެސް އާ ވާހަކައަކަށް ނުވެދާނެ އެވެ. ކާއެއްޗަކީ މީހާގެ ނަފްސާނީ ސިއްހަތަށް ވެސް މުހިއްމު އެއްޗެކެވެ. ހަށިގަނޑަށް ގެއްލުން ހުރި އެއްޗެހި އަބަދު ކާނަމަ އެކަން ނަފްސާނީ ސިއްހަތުން ވެސް ފެންނާނެވެ.

3. ފޯނު ބޭނުންކުރާ ވަރު މަދުކުރުން

މާ ގިނަ ވަގުތު ފޯނު ބޭނުންކުރާ ނަމަ ސްޓްރެސް ލެވެލް މަތިވުން އެކަށީގެންވެ އެވެ. އަދި މީހާގެ ނިދުމަށް ވެސް އަސަރުކުރެ އެވެ. ސްޓްރެސް މެނޭޖްކުރުމަށް ފޯނު ބޭނުންކުރާ މިންވަރު ވަކި ވަރެއްގައި ހިފަހައްޓާލާށެވެ.

4. އާއިލާއާއި ރައްޓެހިންނާއެކު ވަގުތު ހޭދަކުރުން

އިޖުތިމާއީ އެއްބާރުލުމަކީ ސްޓްރެސް މެނޭޖްކުރުމަށް ވަރަށް މުހިއްމު އެއްޗެކެވެ. ސްޓްރެސް މެނޭޖްކުރުމަށް ރައްޓެހިންނާއި އާއިލާ މީހުންނަށް ވަގުތު ދޭށެވެ.

5. ނޫނެކޭ ބުނަން އާދަކުރުން

ގިނަ ފަހަރަށް ކުރަން ބޭނުން ނުވާ ކަންކަން ކުރުމަށް އެއްބަސްވެގެން ސްޓްރެސް ވާން ޖެހެ އެވެ. ކުރަން ބޭނުން ނޫން ކަންކަމަށް ނޫނެކޭ ބުނަން އާދަ ކުރާށެވެ.

6. ފަހުން ކަންކަން ކުރަން ނުބެހެއްޓުން

މިއީ ވަރަށް ގިނަ މީހުން ކުރާ ކަމެކެވެ. ފަހުން ކުރަން ބަހައްޓައިގެން ކަންކަން ފުނި ޖެހި، އެކަމާ ސްރެސްޓް ވާން ޖެހެ އެވެ. ކޮންމެ ދުވަހަކު ވެސް ކުރަން ގަސްދުކުރާ ކަންކަން ލިސްޓްކުރަން އާދަކުރާށެވެ. ލިސްޓްކުރަންވާނީ މާ ބޮޑަށް ބުރަ ނުވާ ގޮތަށެވެ. އަދި އެކަންކަން އެ ދުވަހު ނިންމަން އާދަ ކުރާށެވެ.