ބޮލީވުޑްގެ އަރަމުން އަންނަ ޒުވާން ތަރި ޖާންވީ ކަޕޫރުގެ ފުރަތަމަ ފިލްމު "ދަޑަކް"ގެ މަސައްކަތް ކުރިއަށް ދިޔަ ދުވަސްވަރު އޭނާގެ މަންމަ ސްރީދޭވީއަށް ދޭންވާ ސަމާލުކަން ނުދެވުނީތީ މިއަދު ހިތާމަކުރާ ކަމަށް ޖާންވީ ބުނެފި އެވެ.

އިންޑިއާގެ ނޫހަކަށް ދިން އިންޓަވިއުއެއްގައި ޖާންވީ ބުނީ ދަޑަކްގެ ޝޫޓިން ކުރިއަށް ދިޔަ ދުވަސްވަރު އޭނާ އުޅުނީ މަންމައާ ވަރަށް ދުރުދުރުން ކަމަށެވެ.

ސަބަބެއް ކަމުގައި ޖާންވީ ފާހަގަކުރީ އެދުވަސްވަރު މަންމައާ މާ ކައިރިކޮށް އުޅުނުނަމަ އޭނާއަށް ދާއިރާއަށް ނުކުމެވުނީ ސްރީދޭވީގެ ދަރިއަކަށް ވުމުން ކަމުގައި މީހުން ހީކޮށްފާނެތީ ކަމަށެވެ.

ޖާންވީ ބުނެފައިވަނީ އޭނާއަކީ ހަމައެކަނި ސްރީދޭވީއެއްގެ ދަރިއެއްގެ ގޮތުގައި މީހުން ބަލައިގަންނަން ބޭނުންނުވި ކަމަށާއި އެހެން ކަމުން ދަޑަކްގެ ޝޫޓިންތަކަށް ނާންނަން ވެސް މަންމަ ކައިރިން އެދިފައިވާ ކަމަށެވެ.

އެހެން ނަމަވެސް އެ ދުވަހު އެހެން ކަން ކުރެވުނީތީ މިއަދު ހިތާމަކުރާ ކަމަށާއި މަންމަ ދުރުކުރެވުނީ އޭނާގެ ހަޔާތުގެ ވަރަށް މުހިއްމު ހިއްސާއަކުންކަން މިހާރު ވިސްނޭ ކަމަށް ޖާންވީ ބުންޏެވެ.

ސްރީދޭވީ މަރުވެފައި އޮއްވާ ފެނުނީ ޖާންވީގެ ފުރަތަމަ ފިލްމު ރިލީޒް ކުރުމުގެ ކުރިން 2018 ވަނަ އަހަރު ފެބްރުއަރީ މަހު 20 ވަނަ ދުވަހު ދުބާއީގަ އެވެ. ދަޑަކް ރިލީޒް ކުރެވުނީ އެ އަހަރުގެ ޖުލައި މަހުގެ 20 ވަނަ ދުވަހު އެވެ.