ރައްޔިތުންގެ މަޖިލީހަށް ސިފައިން ވެއްދުމާއި ނުވެއްދުމަކީ ރައީސުލްޖުމްހޫރިއްޔާއާ ބެހޭ ކަމެއް ނޫންކަމަށް ވިދާޅުވެ މަޖިލީހުގެ ރައީސް، ރައީސް މުޙައްމަދު ނަޝީދު ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް ރައްދުދެއްވައިފި އެވެ.

ނަޝީދު މިފަދައިން ވިދާޅުވެފައި ވަނީ، އެމަނިކުފާނު މަޖިލީސް ހިންގަވަމުންދާ ގޮތާއި ގުޅޭގޮތުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ފާޑުވިދާޅުވެފައިވާ ދަނޑިވަޅެއްގައި ކުރެއްވި ޓްވީޓެއްގަ އެވެ.

ރައީސް ސޯލިހުގެ ރިޔާސީ ކެމްޕޭނު ރަސްމީކޮށް ފެއްޓެވުމަށް ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ކުރީ ސަރުކާރުގައި މަޖިލީހަށް ސިފައިން ވައްދާ މެމްބަރުން ބޭރުކޮށްފައި ވީ ނަމަވެސް މިއަދު އެފަދަ އެއްވެސް ކަމެއް ހިނގަމުން ނުދާކަމަށް ވިދާޅުވެފަ އެވެ. އަދި ރައީސް ނަޝީދު މަޖިލިސް ހިންގަވަނީ ބޭނުންފުޅު ގޮތަކަށް ކަމަށްވެސް ވިދާޅުވި އެވެ.

އެކަމަށް އިޝާރާތް ކުރައްވާ ނަޝީދު ކުރެއްވި ޓްވީޓުގައި ވިދާޅުވީ ރައްޔިތުންގެ މަޖިލީހާއި ގުޅުންހުރި ކަންކަމަށް ސިފައިންގެ އެހީތެރިކަމަށް އެދުމަކީ ޤާނޫނީ ގޮތުން ރައީސުލްޖުމްހޫރިއްޔާ އާއި ބެހުމެއް އޮތް ކަމެއް ނޫން ކަމަށެވެ. އަދި އެ އިހްތިޔާރަކީ ރައްޔިތުންގެ މަޖިލީހުގެ ރައީސްއަށް ލިބިގެންވާ އިހްތިޔާރެއް ކަމަށެވެ.

ރައީސް ސޯލިހުވަނީ ޔާމީން ގެ ވެރިކަމުގައި މަޖިލިހުގެ މެމްބަރުންތަކެއް މަޖިލިހަށް ވެންނެވުމަށް ވަޑައިގަތުމުން ހިފައި ހައްޔަރުކޮށް، އެ މެމްބަރުންނާ ދެކޮޅަށް ދައުވާ ވެސް ކުރެއްވި ކަންކަމަށް އިޝާރާތްކޮށް ވާހަކަފުޅު ދައްކަވާފަ އެވެ.

ރައީސް ވިދާޅުވި ގޮތުގައި މި ވެރިކަމުގައި ނޫސްވެރިންގެ ގަލަމުގައި ދޯރި ޖަހާކަށް ނުޖެހެއެވެ. ޓީވީ ޗެނަލްތައް ބަންދު ކުރަން ނާނގާ އިރު، އެއްވެސް ޗެނަލެއް ޖޫރިމަނާކޮށްފައި ނުވާ ކަމަށް ރައީސް ވިދާޅުވި އެވެ.