ހިޔާ ސަރަހައްދުގައި ކުޑަ ކުދިންނަށް ހާއްސަ ޕާކްއެއް ތަރައްގީކުރުމުގެ މަސައްކަތް އެޗްޑީސީން ފަށައިފި އެވެ.

ހުޅުމާލެ ތަރައްގީކުރާ ކުންފުނިން ބުނީ ހިޔާ ސަރަހައްދުގައި ދިރިއުޅޭ ރައްޔިތުންނަށް ހިތްފަސޭހަ މާހައުލެއް ގާއިމުކޮށްދިނުމަށް ކުރެވެމުންދާ މަސައްކަތްތަކުގެ ތެރެއިން، ކުޑަ ކުދިން ކުޅޭނެ ގިނަ އާ ސާމާނުތައް ބެހެއްޓި، އާ ކުޅިވަރުތައް ކުޅެވޭނެ އިންތިޒާމު ހަމަޖެހިފައިވާ ކަމަށެވެ.

މީގެ އިތުރުން، ހިޔާ ޓަވަރުތަކުގެ މެދުގައި ހުންނަ ހުސް ޖާގަތައް އެދެވޭ ގޮތެއްގައި ބޭނުން ކުރުމަށް ޓަވަރުތަކުގައި ދިރިއުޅޭ އާއިލާތަކާއި ގުޅިގެން ޕޮކެޓް ޕާކްތަކެއް ތަރައްގީ ކުރުމުގެ މަސައްކަތް ވެސް ކުރަމުން އަންނަ ކަމަށް އެޗްޑީސީން ބުނެ އެވެ.

ހިޔާ ސަރަހައްދުގައި ދިރިއުޅޭ ރައްޔިތުންނަށް ހިތްފަސޭހަ މާހައުލެއް ގާއިމުކޮށްދިނުމަށް ކުރެވެމުންދާ މަސައްކަތްތަކުގެ ތެރެއިން ހަދާ ކުޑަކުދިންގެ ޕާކުގެ މަސައްކަތް ކުރަނީ. ފޮޓޯ: އެޗްޑީސީ

އެ ކުންފުނިން ބުނީ މި ސަރަހައްދުތަކުގައި ގަސް އިންދާ އަދި، އާއްމުންނަށް ބޭނުން ހިފޭނެ ގިނަ ކަންތައްތަކެއް ހިމެނިފައިވާނެ ކަމަށެވެ. އެޗްޑީސީން ބުނީ އެ ޕޮކެޓް ޕާކްތައް ސީދާ ރައްޔިތުން ބޭނުންވާ ގޮތަށް ތަރައްގީކުރުމުގެ މަގު ފަހި ކޮށްދިނުމަށް ނިންމާފައިވާ ކަމަށެވެ.