އަކްޝޭ ކުމާރާއި ޓައިގާ ޝްރޮޕް ލީޑު ރޯލުން ފެނިގެންދާ ފިލްމް "ބަޅޭ މިޔާ ޗޯޓޭ މިޔާ" ގެ ރޯލަކަށް ޒުވާން ބަތަލާ މަނޫޝީ ޗިއްލަރު ސޮއި ކޮށްފި އެވެ.

މީޑިއާތަކުން ބުނި ގޮތުގައި "ބަޅޭ މިޔާ ޗޯޓޭ މިޔާ" މަނޫޝީ ސޮއިކޮށްފައިވާއިރު މިފިލްމުގައި ތިން ބަތަލާއިން ހިމެނެ އެވެ. މަނޫޝީގެ އިތުރުން ދެން މިފިލްމުގައި ބަތަލާގެ ގޮތުގައި ފެނިގެންދާނީ މިހާރު ކުރިއަރަމުން އަންނަ ބަތަލާ ޖާންވީ ކަޕޫރެވެ. ދެން ނަގާނެ ބަތަލާއަކާ މެދު ޑައިރެކްޓަރު އަލީ އައްބާސް ޒަފަރު މިހާރު އަންނަނީ ވިސްނަމުންނެވެ.

ވާޝޫ ބަގްނާނީ ޕޫޖާ އެންޓަޓައިންމަންޓުން ޕްރޮޑިއުސްކުރާ ފިލްމުގެ ޝޫޓިން ފަށަން ހަމަޖެހިފައި ވަނީ އަންނަ ޖެނުއަރީ މަހުގެ ތެރޭގަ އެވެ.

އެކްޝަން ކޮމެޑީއެއްގެ ގޮތުގައި ހަދާ "ބަޅޭ މިޔާ ޗޯޓޭ މިޔާ" ގެ ވަރަށް ގިނަ މަންޒަރުތަކެއް އިންޑިއާ އިން ބޭރުގައި ނަގާނެ އެވެ. އެގޮތުން އަލީ ވަނީ ދާދި ފަހުން ލޮކޭޝަން ހަންޓްކުރުމުގެ ދަތުރުތަކެއް ވެސްކޮށްފަ އެވެ. މީގެ މަންޒަރުތައް ޔޫރަޕާއި ޔޫއޭއީގައި ނަގާ ގޮތަށް ހަމަޖެހިފައިވެ އެވެ.

"ބަޅޭ މިޔާ ޗޯޓޭ މިޔާ" ސިނަމާތަކަށް ގެންނަން ހަމަޖެހިފައި ވަނީ އަންނަ އަހަރުގެ ޑިސެމްބަރު މަހުގެ ތެރޭގަ އެވެ.

"ބަޅޭ މިޔާ ޗޯޓޭ މިޔާ" ފެނިގެންދާނެ ތަރިން

2017 ގަ މިސް ވޯލްޑް މަގާމު ހޯދި މަނޫޝީ އަކީ މި އަހަރުގެ ޖޫންގައި ރިލީޒްކުރި އަކްޝޭގެ "ސަމްރާޓް ޕްރިތިވީރާޖް" އިން ބޮލީވުޑަށް ނުކުތް ބަތަލާއެކެވެ. މަނޫޝީ، 26، މިހާރު އަންނަނީ ޖޯން އަބްރަހަމާ އެކީ "ތެހެރާން" ކިޔާ ފިލްމެއްގެ މަސައްކަތް ވެސް ކުރަމުންނެވެ. އަދި އޭނަ ވަނީ ވިކީ ކޯޝަލާ އެކީ "ދަ ގްރޭޓް އިންޑިއަން ފެމިލީ" ކިޔާ ފިލްމެއްގެ މަސައްކަތް ވެސް ނިންމައިފަ އެވެ.