އިންޓަނޭޝަނަލް ޔޯގާ ދުވަސް ފާހަގަކުރުމަށް ގަލޮޅު ދަނޑުގައި ކުރިއަށްގެންދިޔަ ހަރަކާތަށް ހުރަސް އަޅައި، ހަމަނުޖެހުން ހިންގި ކަމުގެ ތުހުމަތުގައި ހައްޔަރުކުރި ރައްޔިތުންގެ މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއީލާ ދެކޮޅަށް އެއްވެސް ހެއްކެއް ނެތް ކަމަށް އޭނާގެ ގާނޫނީ ވަކީލު އަލީ ޝާހު ވިދާޅުވެއްޖެ އެވެ.

ޔޯގާ ހަރަކާތް ހުއްޓުވި މައްސަލައިގައި ތުހުމަތުކޮށްފައިވާ ހައްޔަރީންގެ ގާނޫނީ ޓީމުން މިރޭ ބޭއްވި ނޫސްވެރިންގެ ބައްދަލުވުމެއްގައި ގާނޫނީ ވަކީލު ޝާހު ވިދާޅުވީ މުހައްމަދު އިސްމާއީލްގެ ފަރާތުން ފުލުހުންނަށް ފުރިހަމަ އެއްބާރުލުން ލިބޭ ކަމަށެވެ. އެހެންނަމަވެސް އެއްވެސް ހެއްކެއް ނެތް ކަމަށް ވަކީލު ވިދާޅުވި އެވެ.

ޝާހު ވިދާޅުވީ މުހައްމަދު އިސްމާއީލާ ދެކޮޅަށް ހުރި ހެކިތަކަކީ އޭނާ ދިރިއުޅޭ ގޭގެ ކުރިމަތީގައި ސިނގިރެޓެއް ބޯން ހުއްޓައި ނަގާފައިވާ ފޮޓޯ އަކާއި އެވަގުތު މަގުމަތިން ދިޔަ ބަޔަކު މުހައްމަދު އިސްމާއީލަށް ގޮވައި ސަލާން ކުރުން ކަމަށެވެ. ނަމަވެސް އެއީ ކުށެއް ނޫން ކަމަށް ވެސް އޭނާ ފާހަގަކުރެއްވި އެވެ.

މުހައްމަދު އިސްމާއީލް ޓެރަރިޒަމްގެ އަމަލެއް ހިންގަން ކުރި އެއްވެސް ކަމެއް ފުލުހުންނަށް ކޯޓުގައި ބުނެދެވިފައިނުވާ ކަމަށް އޭނާ ވިދާޅުވި އެވެ.

ސުލްހަވެރި އެއްވުމެއް ޣައިރު ގާނޫނީ އެއްވުމަކަށް ބަދަލުކޮށްލުމަށް މުހައްމަދު އިސްމާއީލް ކުރި އެއްވެސް ކަމެއް ބުނެދެވިފައި ވެސް ނުވާ ކަމަށް ވަކީލު ވިދާޅުވި އެވެ.

ޝާހު ވިދާޅުވީ އެ ދުވަހުގެ އެއްވުން ރާވައި ހިންގުމުގައި އެންމެ އިސްކޮށް ހަރަކާތްތެރިވީ މުހައްމަދު އިސްމާއީލް ކަމަށް ފުލުހުން ތުހުމަތު ކުރާ ކަމަށެވެ. ނަމަވެސް އެކަން ސާބިތުކުރެވޭނެ އެއްވެސް ހެއްކެއް ވެސް ނުދެއްކޭ ކަމަށް އޭނާ ވިދާޅުވި އެވެ.

"ލޯއެންފޯސްމަންޓް އެޖެންސީއަކުން ކޯޓެއްގައި ރެޕްރެޒެންޓް ކުރާ ފަރާތަކުން ހަގީގަތުގައި އެއްވެސް އަސާސެއް ނެތި ނުވަތަ އެކަމުން ހުއްޖިއްޔަތު ގާއިމް ކުރުމަކާ ނުލައި އެފަދަ ވާހަކަތައް ތިލަކުރުމަކީ އެންމެ ޒިންމާދާރު ގޮތެއް ނޫން. އެއީ ވަރަށް ޒިންމާދާރުކަން ކުޑަގޮތެއް،" ޝާހު ވިދާޅުވި އެވެ.

ފުލުހުން ތުހުމަތުކުރާ ފަދަ އެއްވެސް ކުށެއް ކޮށްފައިނުވާނެ ކަމަށް މުއްދަތު މަޖިލީހުގައި މުހައްމަދު އިސްމާއީލް މާތްﷲ ގަންދީ ހުވާކޮށްފައިވާ ކަމަށް ޝާހު ވިދާޅުވި އެވެ.

އެ ދުވަހުގެ އެއްވުމުގައި އެއްވެސްގޮތަކަށް މުހައްމަދު އިސްމާއީލް ބައިވެރިވެފައިނުވާ ކަމަށް ވެސް ޝާހު ވިދާޅުވި އެވެ.

ނޫސްވެރިންނަށް މައުލޫމާތު ދެއްވަމުން ގާނޫނީ ވަކީލު އާދަމް އާސިފް ވިދާޅުވީ އެ މައްސަލައިގެ ތަހުގީގު ފެށުމުގެ ކުރިން ޕީޕީއެމްގެ ބޮލުގައި އެކަމުގެ އިލްޒާމް ފުލުހުން އަޅުވާފައިވާ ކަމަށެވެ. ނަމަވެސް ތަހުގީގުގެ ވަކި ހިސާބަކުން އެއީ ޕީޕީއެމާ ގުޅުމެއް ނެތް ކަމެއްކަން ހާމަވެ، އެސިސްޓެންޓް ޕޮލިސް ކޮމިޝަނަރު މުހައްމަދު ރިޔާޒް އެކަމަށް އިއުތިރާފުވެފައިވާ ކަމަށް އޭނާ ވިދާޅުވި އެވެ.

"ފުރަތަމަ ވެސް ތަހުގީގު ކުރުމަކާ ނުލައި ވަކި ބައެއްގެ ބޮލަށް ފޫޅު ކަނޑާލީ. އެހެންނަމަވެސް ތަހުގީގު ކުރީމަ އަދި މި އެނގުނީ މިއީ އަދި ސިޔާސީ ޕާޓީއަކާ ގުޅުންހުރި ކަމެއް ނޫންކަން،" އާސިފް ވިދާޅުވި އެވެ.