ށ. ނޫމަރާގައި އުމުރުން ހަތަރު އަހަރުގެ ކުއްޖަކު މަރާލި ކަމުގެ ކުށް ސާބިތުވެ އެ ކުއްޖާގެ މަންމަ 17 އަހަރަށް ޖަލަށްލުމަށް ކްރިމިނަލް ކޯޓުން ހުކުމް ކޮށްފި އެވެ.

ށ. ފުނަދޫ، ދިނަށަ، އުމުރުން ހަތަރު އަހަރުގެ ފާތިމަތު ޝައިހާ ފަޔާޒު މަރާލިކަމުގެ ކުށުގައި އޭނާގެ މަންމަ އާމިނަތު ޝާހިދާ 17 އަހަރަށް ޖަލަށްލާން ހުކުމްކުރީ މިދިޔަ ބުދަ ދުވަހު އެވެ.

ވަޅިން ހަމަލަދީ ޝާހިދާ އޭނާގެ ދަރިފުޅު ޝައިހާ މަރައިލީ ފެބްރުއަރީ 11، 2016 ވަނަ ދުވަހު އެވެ. އެއީ އެރަށުގައި އެމީހުން ދިރިއުޅެމުންދިޔަ ގޭގެތެރޭގަ އެވެ.

ދަރިފުޅު މަރާލި ކަމަށް ޝާހިދާ ވަނީ ތަހުގީގު މަރުހަލާގައި އިއުތިރާފުވެފަ އެވެ. ނަމަވެސް ޝަރީއަތުގެ މަރުހަލާގައި އެކަމަށް އިންކާރު ކުރި އެވެ.

ފުލުހުން ބުނެފައި ވަނީ ނޫމަރާގައި ޝާހިދާ ދިރިއުޅޭ ގެއަށް ފުލުހުން ދިޔައިރު، ކޮޓަރީގެ އެނދުމަތީގައި ޝައިހާ މަރުވެފައި އޮއްވައި ފެނުނު ކަމަށެވެ. އޭނާ މަރާލި އިރު އުމުރުން ހަ އަހަރުގެ އިތުރު އަންހެން ކުއްޖަކު ވެސް އެ ކޮޓަރީގައި ނިދާފައި އޮތެވެ.

އެ މައްސަލައާ ގުޅިގެން ދައުލަތުން ޝާހިދާގެ މައްޗަށް އުފުލާފައި ވަނީ އެނގިހުރެ މީހަކު މެރުމުގެ ދައުވާއެވެ. ދައުވާ ކުރިތާ އަށް އަހަރު ފަހުން ޝާހިދާގެ މައްޗަށް ކުށް ސާބިތުވީ ހެކީންގެ ހެކިބަހުންނެވެ.

ކްރިމިނަލް ކޯޓުން ހުކުމް ކޮށްފައިވަނީ ޝާހިދާ 17 އަހަރަށް ޖަލަށް ލުމާއެކު މަރުގެ ދިޔައިގެ ގޮތުގައި އެއް މިލިއަން ރުފިޔާ ދެއްކުމަށެވެ. އަދި ކައްފާރާގެ ގޮތުގައި ވިދިވިދިގެން ދެ މަސް ދުވަހު ރޯދަ ހިފުމަށް ވެސް ވަނީ އަމުރުކޮށްފައެވެ.