ރާއްޖޭގެ މަޝްހޫރު ވިޔަފާރި ކުންފުނި ސިމްޑީގެ ވެރިޔާ އިބްރާހީމް މުހައްމަދު ދީދީ (ސިމްޑީ ޑީޑީ) އާއި ކުރީގެ ހެލްތު މިނިސްޓަރު މަރިޔަމް ޝަކީލާގެ ކުރީގެ ޅީދަރިފުޅު ޗެމްސީ އެލެކްޒެންޑަރާ ނިއާޑް މަސްތުވާތަކެތީގެ މައްސަލައެއްގައި އޮސްޓްރޭލިއާއިން ހައްޔަރުކޮށްފި އެވެ.

އޭނާ ހައްޔަރުކޮށްފައި ވަނީ އޮސްޓްރޭލިއާ ފުލުހުން ހިންގި ހާއްސަ އޮޕަރޭޝަނެއްގަ އެވެ. ޗެމްސީއަކީ އިބްރާހީމް ދީދީގެ ދަރި، މާއިޒް އިބްރާހީމްގެ ކުރީގެ އަންހެނުންނެވެ.

އެ ދެ މީހުންނަކީ ވެސް ސިމްޑީގެ މަގާމްތަކުގައި ކުރިން އުޅުނު ދެ މީހުންނެވެ. އެގޮތުން މާއިޒްއަކީ ސިމްޑީގެ ޑިރެކްޓަރެކެވެ. އަދި އޭނާގެ އަންހެނުން ޗެމްސީ ހުރީ ސިމްޑީގެ ޓްރޭޑް ޑިވެލޮޕްމެންޓް އޮފިސަރަކަށެވެ.

އޮސްޓްރޭލިއާގެ ނޫސްތަކުގައިވާގޮތުން ޗެމްސީއަށް ކުރާ ތުހުމަތަކީ އޮސްޓްރޭލިއާގެ އެއް ސްޓޭޓުން އަނެއް ސްޓޭޓަށް މަސްތުވާތަކެތި ޓްރެފިކްކުރާ ނެޓްވޯކެއްގައި ބައިވެރިވާކަމުގެ ތުހުމަތެވެ.

އެ ގައުމުގެ ކުރީގެ މަޝްހޫރު ފުޓުބޯޅަ ކުޅުންތެރިޔާ ސޭމް ފިޝާ އާ ބައިވެރިވެގެން މަސްތުވާތަކެތީގެ ވިޔަފަރިކުރާ ކަމަށް ވެސް އޭނާގެ މައްޗަށް ތުހުމަތުކުރެވެ އެވެ. ސޭމް ފިޝާ ވެސް ވަނީ ހައްޔަރުކޮށްފަ އެވެ.

އެއް ކިލޯ މެތާއި 84 ގްރާމް ވިކްޓޯރިއާއިން ވެސްޓާން އޮސްޓްރޭލިއާއަށް އެތެރެ ކުރަން ޗެމްސީ އުޅުނު ކަމަށް ތުހުމަތު ކުރެވެއެވެ. ހަމައެހެންމެ 129،000 އޮސްޓްރޭލިއާ ޑޮލަރު ވިކްޓޯރިއާއަށް ފޮނުވުމަށް މަސައްކަތް ކުރި ކަމުގެ ތުހުމަތު ވެސް ކުރެވެ އެވެ.

އުމުރުން 27 އަހަރުގެ ޗެމްސީ ހައްޔަރުކޮށްފައިވަނީ މިދިޔަ މެއި މަހު އެވެ.

އޭނާގެ މައްޗަށް ކޮށްފައިވާ ތުހުމަތުތަކުގެ ތެރޭގައި މަނާކޮށްފައިވާ ހަތިޔާރެއް ގެންގުޅުމާއި، ކޮކެއިން އަދި މެތު ގެންގުޅުމާއި، އިތުރު އެހެން ބައެއް މަސްތުވާ ބޭސްތައް ގެންގުޅުމުގެ ތުހުމަތު ހިމެނެ އެވެ.