"މާގެ ނަބިއްޔާ"ގެ ނަމުގައި މާލޭގައި މިއަދު ސައިކަލް ބުރެއް ބާއްވައިފި އެވެ.

މިއަދު ހަވީރު 4:00 ގައި ބޭއްވި މި ސައިކަލް ބުރުގައި ގިނަ އަދަދެއްގެ ޒުވާނުން ބައިވެރިވެފައިވެ އެވެ. މި ސައިކަލް ބުރުގައި ބައިވެރިވި ޒުވާނުން ބުނީ ރަސޫލާއަށް ފުރައްސާ ކުރުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫން ކަމަށެވެ.

މަޖީދީ މަގާއި ބޮޑުތަކުރުފާނު މަގުން ދުއްވަމުން ގޮސް، ސައިކަލް ބުރު ނިންމާލީ 6:00 ގައި ރަސްފަންނު ސަރަހައްދަށެވެ. ސައިކަލް ބުރު ނިންމާލީ ޚައްސަ ދުއާއަކުންނެވެ.

ރަސޫލާގެ ދިފާއުގައި މާލޭގައި މިއަދު ބޭއްވި ސައިކަލް ބުރުގެ ތެރެއިން

މި ސައިކަލް ބުރުގައި އެކި އެކި ލިޔުންތައް ލިޔެފައިވާ ބެނާތައް ޒުވާނުން ގެންގުޅުނެވެ. ކުރީގެ އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ވަނީ އެ ސައިކަލް ބުރުގައި ބައިވެރިވި ޒުވާނުންނަށް ޝުކުރުއަދާކޮށްފަ އެވެ.

ޑރ. ޝަހީމް ވިދާޅުވީ ކީރިތި ރަސޫލާއަށާއި އެކަލޭގެ ފާނުގެ މަތިވެރި ޝަރަފަށް އުނިކަން ލިބުނު ހިނދު، މުސްލިމުން އެކަން ބަލައިގަނެގެން ނުވާނެ ކަމަށެވެ. އަދި އެއީ އީމާންކަން ފުރިހަމަކުރުމަށްޓަކައި ކޮންމެހެން ކުރަންޖެހޭ ކަމެއް ކަމަށް ވެސް ވިދާޅުވި އެވެ.

ޒުވާނުންތަކެއް މިފަދަ ސައިކަލް ބުރެއް ބާއްވާފައި މިވަނީ އިންޑިއާގެ ޓީވީ ޗެނަލެއްގައި ވާހަކަ ދައްކަމުން އެ ގައުމުގެ ވެރިކަން ކުރާ ބީޖޭޕީގެ ތަރުޖަމާން ނުޕުރު ޝަރުމާ، ރަސޫލާއަށް ފުރައްސާރަކޮށް ކީރިތިގުރުއާނަށް މަލާމާތް ކުރުމުންނެވެ.

މިކަން ރާއްޖޭގެ ހުރިހާ ސިޔާސީ ޕާޓީތަކުން ވަނީ ކުށްވެރިކޮށް ބަޔާނެއް ނެރެފަ އެވެ. އަދި ދިވެހި ސަރުކާރުން ވެސް ވަނީ އެކަން ކުށްވެރިކޮށް އެއީ ބަލައިގަނެވޭނެ ކަމެއް ނޫން ކަމަށް ބަޔާންކޮށް ބަޔާނެއް ނެރެފަ އެވެ.