ހިޔާ ފްލެޓްގެ އޭޕްރީލް މަހުގެ ކުލި ދެއްކުން މި މަހުގެ 30 ވަނަ ދުވަހުގެ ނިޔަލަށް ފަސްކޮށްފި އެވެ.

ހިޔާ ފްލެޓްތަކުގެ ކުލި ނަގަން ފަށަނީވެސް މި މަހުގަ އެވެ. އެ ކުންފުނިން އަންގާފައި ވަނީ މި މަހުގެ 10 ގައި ކުލި ދެއްކުމަށެވެ.

ގިނަ ބައެއްގެ ކަންބޮޑުވުންތަކާއެކު އެ ކުންފުނިން މިރޭ ވަނީ މި މަހުގެ ކުލި ދައްކަންޖެހޭނީ މި މަހުގެ 30 ވަނަ ދުވަހު ކަމަށް ކަނޑައަޅާފަ އެވެ.

އެޗްޑީސީން މިރޭ ނެރުނު ބަޔާނުގައި ވަނީ މި މުއްދަތުގެ ތެރޭގައި އެ ކުންފުނީގެ ޕޭމެންޓް ޕޯޓަލް އަދި ކައުންޓަރުން ފައިސާ ދެއްކުމުގެ އިންތިޒާމް ހަމަޖައްސާފައިވާ ކަމަށެވެ. އަދި އެއްވެސް އިތުރު ޖޫރިމަނާއެއް ނާރާނެ ކަމަށް ވެސް އެ ކުންފުނިން ބުންޏެވެ.

ކުލި ދެއްކުމުގެ ކަންކަމާ ގުޅޭގޮތުން އިތުރު މައުލޫމާތު ފޯރުކޮށްދިނުމަށާއި އެހީތެރިވުމަށް ޓަކައި މާދަމާއިން ފަށައިގެން ކޮންމެ ރެއަކު 9:00އިން 11:00އަށް ހިޔާ ސަރަހައްދުގައި "ހެލްޕް ޑެސްކް"އެއް ބެހެއްޓުމަށް ވަނީ ނިންމާފަ އެވެ.

އެޗްޑީސީން އަންނަ މަހުން ފެށިގެން ކޮންމެ މަހެއްގެ 10 ވަނަ ދުވަހުގެ ކުރިން ކުލި ދައްކަންޖެހޭނެ ކަމަށެވެ. ޖޫރިމަނާ އަރާނީ އޭގެފަހުން ކުލި ދައްކާނަމަ އެވެ.